İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 108 Hüküm no: 87 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Yusuf b. Abdullah’ın vakıf evi feragat karşılığında üvey babası İbrahim Bey b. Abdullah’a verdiği eşyaları evi teslim etmediğinden geri almak istemesi Mahmiye-i İstanbul’da Sultan Bayezid -aleyhi’r-rahmetü ve’l-gufrân- Câmi‘-i şerîfi kurbünde sâkin Sabuncu Yusuf b. Abdullah meclis-i şer‘-i şerîf-i enverde üveyi babası İbrahim Bey b. Abdullah mahzarında üzerine da‘vâ ve takrîr-i kelâm edip bundan akdem mezbûr İbrahim mahmiye-i mezbûre Beyceğiz mahallesinde vâki‘ meşrûtiyet üzere olduğu vakf menzilin mikdâr-ı ma‘lûmunu bana ferâgat etmek için elli dirhem ipek ve bin sekiz yüz akçelik kereste ve on iki keyl pirinç ve yirmi iki çeki odun ve on sekiz vukıyye revgan-ı sâde ve iki bogası kapama ve iki sarık ve bir hilâlî kuşak ve iki çift mest ve papuç ve iki terlik ve bi’d-defe‘ât nukūd üç yüz kırk akçemi def‘ ve teslîm ol dahi ber-vech-i mübeyyen ahz u kabz edip hâlâ mezbûr İbrahim Bey ferâgat-ı mezbûreden imtinâ‘ etmekle suâl olunup nukūd-ı mezbûre ve eşyâ-i mezkûrenin mevcûde ise a‘yânını müstehleke ise kıymet-i şer‘iyyeleri bana redd ü teslîme tenbîh olunmak matlûbumdur dedikde gıbbe’s-suâl mezbûr İbrahim Bey cevâbında müdde‘î-i mezbûrdan ancak iki kapama ve bir sarık ve bir kuşak ber-vech-i muharrer ahz u kabzını ikrâr, mâ‘adâsını inkâr edicek, müdde‘î-i mezbûrdan sıdk-ı makāline mutâbık beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka mârru’z-zikr iki kapama ve bir sarık ve bir kuşakdan mâ‘adâ olan eşyâ-i mezkûre ve nukūd-ı mezbûreyi ahz u kabz etmeyip ber-vech-i mübeyyen üzerinde mâ‘adâ için red ve zımândan bir nesne lâzım gelmediğine merkūm İbrahim Bey’e yemîn teklîf olundukda ol dahi [alâ] vefki’l-mes’ûl yemîn billâhi’l-azîm etmeğin mûcebince merkūm İbrahim Bey ikrârı üzere mârru’z-zikr iki kapama ve bir sarık ve bir kuşak müdde‘î-i mezbûr Yusuf’a redd ü teslîm ol dahi ahz u kabz etdiğinden sonra ziyâde da‘vâsıyla bilâ-beyyine müdde‘î-i mezbûr Yusuf mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sânî mine’l-Muharremi’l-harâm li-sene mi’e ve elf. Şuhûdü’l-hâl: Hüseyin Efendi b. Musa, Süleyman Efendi b. Mahmud, İbrahim b. Hüseyin, Mustafa b. İbrahim, İbrahim Çelebi [b.] Ahmed, Siyavuş.