İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 109 Hüküm no: 88 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. A‘ma Hasnun mehir ve nafakasını alarak kocası Kalender b. Mehmed’den boşanması Dâru’l-hilâfeti’l-aliyyeti’l-Osmâniyye Kostantıniyyetü’l-mahmiyye -[suyyinet] ani’l-âfât ve’l-beliyye- mahallâtından Âşık Paşa mahallesi sâkinelerinden Âişe bt. A‘mâ Hasnun? nâm hatun ba‘de’t-ta‘rîfi’ş-şer‘î meclis-i şer‘-i şerîf-i enver ve mahfil-i dîn-i münîf-i ezherde zevc-i dâhili işbu sâhibü’l-vesîka Kalender b. Mehmed nâm kimesne mahzarında ikrâr ve takrîr-i kelâm edip mezbûr Kalender zevcim olup târih-i kitâbdan bir gün mukaddem beni bâ’inen tatlîk etmekle zimmetinde mütekarrir ve ma‘kūdün-aleyh dört yüz akçe mehr-i müeccelim ve nafaka-i iddet ve me’ûnet-i süknâm için bi’t-terâzî ta‘yîn olunan üç yüz akçe ki cem‘an yedi yüz akçe hakkımı merkūm Kalender bana def‘ ve teslîm, ben dahi ber-vech-i muharrer yedinden ahz u kabz edip ba‘de’l-yevm hukuk-ı zevciyyete müte‘allika âmme-i de‘âvî ve mütâlebâtdan mezbûr Kalender’in zimmetini ibrâ-i âmm-ı râfi‘u’l-hısâm ile ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis mine’l-Muharremi’l-harâm li-sene mi’e ve elf. Şuhûdü’l-hâl: el-Hâc Ali b. Abdi, İbrahim b. Mehmed, Receb b. Mustafa, İbrahim Çelebi b. Çorlulu Ahmed.