İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 110 Hüküm no: 90 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Receb’in birtakım eşyalarını kocası Ömer Bey b. Hüseyin’e satması Mahmiye-i İstanbul’da Ali Paşa-yı Atîk mahallesinde sâkine olup zâtı ma‘rifet-i şer‘iyye ile ârifân Mustafa Çelebi b. Mehmed ve Bayram b. Abdullah nâm kimesneler ta‘rîfiyle mu‘arrefe olan Emine bt. Receb nâm hatun meclis-i şer‘-i şerîf-i enver ve mahfil-i dîn-i münîf-i ezherde zevc-i dâhili sâhib-i hâze’l-kitâb Ömer Bey b. Hüseyin mahzarında ikrâr-ı tâm ve takrîr-i kelâm edip eşyâ-i memlûkemden üç aded minder ve iki müsta‘mel beledî döşek ve müsta‘mel dokuz aded Bursa yasdığı ve müsta‘mel sekiz aded yemenî yorgan ve bir tepsi ve bir leğen ve kılâbdanlı müsta‘mel üç aded Hatâî kaftanımı zevcim mezbûr Ömer Bey’e bi-safkatin vâhidetin tarafeynden îcâb ve kabûlü hâvî bey‘-i kat‘î ile yüz guruşa bey‘ ve temlîk ve teslîm, ol dahi ber-vech-i muharrer yüz guruş mütâlebesinden zevce-i mezbûrun zimmetini ibrâ-i âmm-ı kātı‘ü’n-nizâ‘la ibrâ ve ıskāt edip ba‘de’l-yevm eşyâ-i mezbûrede benim alâkam kalmayıp zevcim mezbûr Ömer Bey’in mülk-i müşterâ ve hakk-ı sırfı olduğundan mâ‘adâ zevcim mezbûr Ömer Bey zimmetinde mütekarrir ve ma‘kūdün-aleyh olan on bin akçe mehr-i müeccelimin dokuz bin beş yüz akçesini hasbeten lillâhi’l-melik’l-mennân mezbûr Ömer Bey’e hibe-i sahîha-i şer‘iyye ile hibe eyleyip ol dahi meclis-i hibede kabûl eyledi, min ba‘d mehr-i müeccelimden zimmetinde ancak beş yüz akçe hakkım kalmışdır dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sânî min-Muharremi’l-harâm li-sene mi’e ve elf. Şuhûdü’l-hâl: Ahmed Efendi b. Mehmed, Yahya Efendi b. Hüseyin, Bayram Çelebi b. Ramazan, Hüseyin Çelebi b. ( ), İbrahim Çelebi b. el-Hâc Ahmed.