İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 111 Hüküm no: 91 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman olan Ayşe Hatun’un miras konusunda ceddi İstirato ile sulh olması Mahmiye-i İstanbul’da el-Hâc Muhyiddin mahallesi sükkânından iken bundan akdem hâlikân olan Güran bt. Mankok ve Kirko v. İstirato’nun hîn-i h[el]âklerinde nasrâniye ve hâlâ şeref-i İslâm ile müşerref olan Âişe nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde ceddi işbu bâ‘isü’s-sifr İstirato v. ( ) nâm zimmî muvâcehesinde ikrâr ve takrîr-i kelâm edip mûrislerim hâlikân-ı mezbûrânın terekelerinden bir terpûş ve bir kaftan ve bir sîm bilezik ve bir sîm saçbağı ve mahrûse-i Üsküdar’da vâki‘ ma‘lûmü’l-hudûd bostan mahsûlünden ve sâir terekelerine ceddim mezbûr İstirato vaz‘-ı yed etmekle mezbûrdan taleb ve da‘vâ eylediğimde ol dahi inkâr etmeğin beynimizde nizâ‘-ı küllî vukū‘undan sonra beynimize muslihûn tavassut edip da‘vâ-yı mezkûremden beni merkūm İstirato ile an-inkâr beş guruş ile iki guruş kıymetli bir çift küpe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr ile mârru’z-zikr küpeyi mezbûrun yedinden tamâmen ahz u kabz eylediğimden sonra tereke-i hâlikân-ı mezbûrâna müte‘allika âmme-i da‘vâdan mezbûrun zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis min-Muharremi’l-harâm li-sene mi’e ve elf. Şuhûdü’l-hâl: Mustafa Beşe b. Abdullah, Osman b. Ramazan, Ömer b. ( ), Ahmed Çavuş, İbrahim Çelebi b. Ahmed, Hüseyin b. Mustafa.