İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 112 Hüküm no: 93 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağazâde Ahmed Ağa Vakfı mütevellisi Halil Ağa b. İsmail’in Belgrad’da vefat eden Mehmed Ağa b. Mustafa Ağa’daki vakfın alacağını varislerinden tahsil etmek istemesi Ashâb-ı hayrâtdan Mustafa Ağazâde merhûm Ahmed Ağa Vakfı’na mütevellî olan işbu bâ‘isü’l-kitâb Halil Ağa b. İsmail meclis-i şer‘-i şerîf-i enverde mahmiye-i İstanbul’da Kâtib Şemseddin mahallesi ahâlîsinden olup Belgrad’da bundan akdem vefât eden Mehmed Ağa b. Mustafa Ağa b Ahmed’in evlâd-ı sıgārı Mustafa Bey ve İbrahim Bey ve Rukiye ve Kerime’nin bâ-hüccet-i şer‘iyye zamm-ı vasî olmağla tereke-i müteveffâ-yı mezbûra vâzı‘atü’l-yed olan vâlideleri Hadice Hanım bt. el-merhûm Müfettiş Mehmed Paşa’nın vekîl-i müseccel-i şer‘îsi es-Seyyid Mehmed Ağa b. Osman mahzarında üzerine da‘vâ ve takrîr-i kelâm edip bin doksan dört senesi Ramazânü’l-mübârek gurresinde mütevellîsi olduğum mâl-ı vakf-ı mezbûrdan beş yüz esedî guruşu mezkûr Mehmed Ağa’ya bi’t-tevliye idâne ve teslîm, ol dahi istidâne ve kabz edip ve yine ol târihden bir sene tamâmına değin onu on bir hesâbı üzere elli guruş ilzâm, ol dahi devr-i şer‘î ile iltizâm ve kabûl edip kable’l-edâ fevt olup tereke-i vâfiyesini mezbûre Hadice Hanım kabz etmeğin suâl olunup tereke-i vâfiyesinden hâlâ asl-ı mâl-ı mezbûr ve iltizâm olunan cem‘an beş yüz elli guruşun alıverilmesi matlûbumdur dedikde gıbbe’s-suâl vekîl-i mezbûr cevâbında fi’l-hakīka müvekkile-i mezbûrenin tereke-i müteveffâ-yı mezbûra vaz‘-ı yedini ikrâr lâkin deyn-i mesfûrunu inkâr edicek, müdde‘î-i mezbûrdan müdde‘âsına beyyine taleb olundukda yine mahmiye-i mezbûre Şah Sultan mahallesinde udûl-ı müslimînden Yusuf Ağa b. Abdullah ve Çukur mahalle ahâlîsinden Yahya Çelebi b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu mütevellî-i mezbûr mezkûr Kâtib Şemseddin mahallesi ahâlîsinden olup Belgrad’da fevt olan mezkûr Mehmed Ağa b. Mustafa Ağa b. Ahmed bin doksan dört senesi şehr-i Ramazânü’l-mübârek gurresinde kemâl-ı âfiyetde asl-ı mâl-ı vakf-ı mezbûrdan bizim huzûrumuzda beş yüz esedî guruş idâne ve devr-i şer‘î ile bir sene tamâmına değin elli guruş murâbaha ilzâm, ol dahi istidâne ve iltizâm ve kabûl ve kabz etmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olup ve mütevellî-i mezbûr tahlîf-i şer‘î ile tahlîf olunmağın mûcebiyle ba‘de’l-hükm mâ-vaka‘a bi’t-taleb ketb olundu. Fî gurreti’l-Muharremi’l-harâm li-sene mi’e ve elf. Şuhûdü’l-hâl: Abdurrahman Efendi b. Mehmed Kâtib-i Muhâsebe, Kâtib-i Vakıf İbrahim Efendi b. Musli, Ali Efendi b. Zeynel, el-Hâc Osman b. Ali, İbrahim Bey.