İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 113 Hüküm no: 94 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paçacı taifesinden Şişko Ahmed b. Abdullah ile oğlu Ömer’in terekelerinin varisler arasında paylaşılması Paçacı tâifesinden olup bundan akdem vefât eden Şişko Ahmed b. Abdullah’ın verâseti sulbî oğulları Ömer ve Hasan’a munhasıra olup ba‘dehû mezbûr Ömer dahi vefât edip verâseti zevce-i metrûkesi Hadice bt. Mehmed ve sulbî kebîr oğlu Halil’e munhasıra ve tashîh-i meselesi on altı sehimden olup sihâm-ı mezbûrenin bir sehmi mezbûr Hatice’ye ve on bir sehmi mezbûr Halil’e ve dört sehmi mezbûre Fâtıma’ya isâbeti tahakkukundan sonra mezbûr Halil kendi tarafından asâleten ve vâlidesi mezbûre Hadice tarafından vekîl-i şer‘îsi olmağla vekâleten meclis-i şer‘-i şerîf-i enverde tâife-i mezbûreden işbu bâ‘isü’l-kitâb Mehmed Beşe b. İbrahim ve Abdi Beşe b. Murad ve Hüseyin Beşe b. Ali mahzarlarında ikrâr ve takrîr-i kelâm edip ceddim müteveffâ-yı mezbûr Şişko Ahmed’in terekesinden olup mahmiye-i İstanbul’da Küçük Karaman’da vâki‘ olan başhânede mevcûd bir büyük kazgan ve bir yeş? kazganı ve iki tencere ve bir keşir tenceresi ve sâir beynimizde ma‘lûme âlât-ı lâzımesinden on altı sehimden benim ve vâlidemin hissemiz olan on iki sehm-i şâyi‘imizi bi-cümleti’t-tevâbi‘ nısfı mezbûr Mehmed Beşe ve nıfs-ı âharı mezbûrân Abdi Beşe ve Hüseyin Beşe’ye olmak üzere üç bin dokuz yüz akçeye bi-safkatin vâhidetin mezbûrûna bey‘ ve teslîm, onlar dahi ber-vech-i meşrûh iştirâ ve teselllüm ve kabûl etdiklerinden sonra semeni olan meblağ-ı mezbûr üç bin dokuz yüz akçeyi yedlerinden tamâmen ahz u kabz eyledim, ba‘de’l-yevm eşyâ-i mezkûrede bir vechile alâkamız kalmayıp ber-vech-i mübeyyen sihâm-ı mezkûremizin nısfı mezbûr Mehmed Beşe’nin ve nısf-ı âharı mezbûrân Abdi Beşe ve Hüseyin Beşe’nin mülk-i müşterâları olmuşdur, keyfe mâ yahtârûn mutasarrıfûn olsunlar dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene mi’e ve elf. Şuhûdü’l-hâl: Kethudâ-yı Mehmed Bey b. Ahmed, İhtiyâr el-Hâc Yusuf b. Mustafa, Mustafa Beşe b. Hüseyin, Mehmed Beşe b. İbrahim, Ömer Bey b. İbrahim, Mengenecibaşı Mustafa.