İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 113 Hüküm no: 95 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Davud Paşazâde Süleyman Bey’in kızları Afife, Ayşe ve Safiye’ye ait paralardan vasilerinin sefer-i hümayun mühimmatı için miriye borç vermesi Husûs-ı âti’l-beyânı mahallinde tahrîri için fermân-ı âlî sâdır olmağla imtisâlen-leh savb-ı şer‘-i şerîfden irsâl olunan Mevlânâ es-Seyyid Abdülmu‘ti Efendi Âsitâne-i Sa‘âdet’ime bi’l-fi‘il kāimmakām-ı vezâret-i uzmâ ve nâib-i menâb-ı vekâlet-i kübrâ olan vezîr-i rûşen-zamîr-i müşterî-tedbîr mümehhid-i bünyâni’d-devleti ve’l-ikbâl müşeyyid-i erkâni’s-sa‘âdeti ve’l-iclâl el-muhtassu bi-mezîdi inâyeti’l-meliki’l-a‘lâ devletlü ve sa‘âdetlü Ömer Paşa -dâme birruhû ve feşâ- hazretlerinin sarây-ı âlîlerine varıp zeyl-i kitâbda muharrerü’l-esâmî udûl-ı müslimîn ve sikāt-ı muvahhidîn huzûrunda akd-i meclis-i şer‘-i mübîn eyledikde medîne-i Hazret-i Ebî Eyyüb el-Ensârî’de sâkin iken bundan akdem vefât eden merhûm Davud Paşazâde Süleyman Bey’in sulbiye sagīre kızları Afife ve Âişe ve Safiye’nin kıbel-i şer‘den mansûb vasîleri olan el-Hâc Mahmud b. Receb meclis-i ma‘kūd-ı mezbûrede vezîr-i müşârun-ileyh hazretleri mahzarlarında bi’l-vesâye ikrâr ve takrîr-i kelâm edip bundan akdem yedimde olan işbu hüccet nâtık olduğu üzere sefer-i hümâyûn mühimmâtı için istidâne lâzım gelmekle taraf-ı mîrîden sagīrât-ı mezbûrât mâllarından ben hacc-ı şerîfde iken nâzırları İbrahim Çelebi b. Mahmud yedinden dört kîse akçe olmak üzere iki bin guruş istidâne ve kabz olunup ve çuka bahâsından dahi iki yüz guruş ki cem‘an iki bin iki yüz guruş deyn-i mîrî mukābelesinde taraf-ı şehriyârîden işbu kırmızı minâkârî her yâfte ortasında on dokuz taşlı elmâs ve etrâfı sagīr elmâslar ile murassa‘ iki yâfte elmâslı murassa‘ olup ol vakitde iki bin iki yüz elli guruş kıymet ile tahmîn olunup ve hâlâ bin iki yüz elli guruş ile tahmîn olunan işbu ön cevâhir kuşak nâzır-ı mezbûra rehn vaz‘ ve teslîm olunup ba‘dehû ben hacc-ı şerîfden geldikde nâzır-ı mezbûr kuşak-ı merkūmu bana def‘ ve teslîm ve meblağ-ı mezbûru ahz u kabza tarafından beni ihâle ve tevkîl etmişdi. El-hâletü hâzihî zikr olunan kuşak deyn-i mezkûr için değer kıymetiyle temlîk olunmak bâbında hatt-ı hümâyûn-ı şevket-makrûn vârid olmağla verese-i müşârun-ileyh hazretleri bâ-hatt-ı hümâyûn deyn-i mezkûre mukābelesinde mârru’z-zikr kuşağı bi’l-vekâle temlîk, ben dahi vesâyetim hasebiyle ber-vech-i muharrer temellük ve kabûl ve tesellüm eyledim dedikde gıbbe’t-tasdîki’l-mu‘teberi’l-vicâhî vâki‘-i hâli mevlânâ-yı mezkûr mahallinde tahrîr ve ma‘an ba‘s olunan Mehmed Çelebi b. İdris’le meclis-i şer‘a gelip her biri alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Fahrü’l-emâcid ve’l-a‘yân İbrahim Paşazâde Mehmed Bey, Umdetü erbâbi tahrîri’r-rakam Mahmud Efendi, Fahrü’l-emâsil ve’l-eşbâh Çavuşbaşı Eyüb Ağa b. Salih, Kuyumcu Hasan Ağa, (…) Abdi b. Receb, Hüseyin b. Yusuf, Osman Çavuş ve gayruhüm şâhidân.