İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 114 Hüküm no: 96 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Osman Vakfı mütevellisi olan el-Hac Mehmed b. Eyüb’ün Mustafa b. Mehmed’den vakfın alacağını istemesi Ashâb-ı hayrâtdan el-Hâc Osman Vakfı’na mütevellî olan işbu bâ‘isü’l-kitâb el-Hâc Mehmed b. Eyüb meclis-i şer‘-i hatîrde bundan akdem vefât eden Haffâf el-Hâc Mehmed’in kebîr oğlu Mustafa nâm kimesne mahzarında bi’t-tevliye üzerine da‘vâ ve takrîr-i kelâm edip mezbûr Mustafa zimmetinde mütevellîsi olduğum vakf-ı mezbûr mâlından ba‘de külli’l-hesâb elli üç esedî guruş deyni olup taleb eylediğimde edâdan imtinâ‘ eder, suâl olunup edâya tenbîh olunmak matlûbumdur dedikde gıbbe’s-suâl mezbûr Mustafa cevâbında fi’l-hakīka vakf-ı mezbûra ba‘de külli’l-hesâb elli üç esedî guruş deyni olduğunu tav‘an ikrâr u i‘tirâf etmeğin alâ mûcebi i‘tirâfihî meblağ-ı mezbûr elli üç esedî guruşunu mütevellî-i mezbûra edâ ve teslîm mezkûr Mustafa’ya tenbîh olunup mâ-vaka‘a bi’t-taleb ketb olundu. Fî gurreti’l-Muharrem li-sene mi’e ve elf. Şuhûdü’l-hâl: el-Hâc Mustafa b. Eyüb, İbrahim Çelebi b. Ahmed, Ali b. Bâli ve gayruhüm.