İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 115 Hüküm no: 98 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David v. Orham adlı Yahudi’nin kefalet sebebiyle Tercüman Yanaki v. Kanakozna’ya olan borcunu tecil etmesi Mahmiye-i İstanbul’da Balatkapısı kurbünde el-Hâc İsa mahallesinde sâkin David v. Orham nâm Yahudi meclis-i şer‘-i şerîf-i enverde işbu bâ‘isü’l-vesîka Tercüman Yanaki v. Kanakozna nâm zimmî muvâcehesinde ikrâr-ı tâm ve takrîr-i kelâm edip mezbûr Yanaki’nin gāib ani’l-meclis Salamon Eskinazi nâm Yahudi zimmetinde beynlerinde ma‘lûm hatâî bahâsından iki yüz yedi guruşla bir sülüs hakkı olup deyn-i meblağ-ı mezbûra bi’l-emr ve’l-kabûl kefâlet-i sahîha-i şer‘iyye ile kefîl oldukdan sonra mezbûr Yanaki meblağ-ı mezbûrun doksan iki guruşunu asîl-i mezbûrdan istîfâ ve ahz edip bâkī kalan yüz on beş guruşla bir sülüsü mezbûr Yanaki bi-hükmi’l-kefâlet benden taleb eyledikde ben dahi hâlâ edâya iktidârım olmamağla te’cîle tâlib olduğumda mezbûr Yanaki dahi meblağ-ı bâkī-i mezbûr yüz on beş guruşla bir sülüsü târih-i kitâbdan yüz seksen bir gün tamâmına değin te’cîl ve imhâl eyledikde ben dahi te’cîl-i mezbûru kabûl ve min ciheti’l-kefâlet deynim olan meblağ-ı bâkī-i mezbûr yüz on beş guruşla bir sülüsü va‘de-i mezbûre hulûlünde mezbûr Yanaki’ye edâ ve teslîme ta‘ahhüd ve iltizâm eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ve’l-istîfâ ketb ve imlâ olundu. Fi’s-sâlis mine’l-Muharremi’l-harâm li-sene mi’e ve elf. Şuhûdü’l-hâl: Mehmed Çavuş Hasköy’den, İbrahim Çelebi b. Ahmed, el-Hâc Mustafa b. Tevekkül, İsmail b. Mehmed, Aleksandra Yakomi, David v. Mosi, Yanaki v. Aspandon.