İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 117 Hüküm no: 101 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaz taifesinden el-Hac Mehmed b. Osman’ın Ebubekir b. Receb’deki alacağının tahsilini istemesi Canbaz tâifesinden bâ‘is-i hâze’l-kitâb el-Hâc Mehmed b. Osman nâm kimesne meclis-i şer‘-i şerîf-i enverde ve mahfil-i dîn-i münîf-i ezherde Ebûbekir b. Receb nâm kimesne mahzarında üzerine da‘vâ ve takrîr-i kelâm edip mezbûr Ebûbekir zimmetinde yedimden iştirâ ve kabz eylediği evsâfı beynimizde ma‘lûm bârgir bahâsından on üç buçuk guruş hakkım olmağla taleb eylediğimde bana edâdan imtinâ‘ eder, hâlâ mezbûr Ebûbekir’e suâl olunup alıverilmesi matlûbumdur dedikde gıbbe’s-suâl mezbûr Ebûbekir cevâbında fi’l-hakīka kaziyye minvâl-i muharrer üzere olup müdde‘î-i mezbûra cihet-i mezkûreden zimmetimde vâcibü’l-edâ ve lâzımü’l-kazâ on üç buçuk guruş deynim vardır deyü bi-tav‘ihî ikrâr u i‘tirâf etmeğin mûcebince meblağ-ı mezbûr on üç buçuk guruşu müdde‘î-i mezbûra edâ ve teslîme merkūm Ebûbekir’e tenbîh olunup mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Ali Çelebi b. Bâli, Mehmed Çelebi b. İdris, Ebûbekir b. Hüseyin.