İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 117 Hüküm no: 102 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergah-ı Âlî Yeniçerileri Yetmişüçüncü Cemaatine mahsus para vakfı mütevellisi Durmuş b. İvaz’ın vakfın İbrahim Ağa b. Hüseyin’deki alacağını tahsil etmek istemesi Dergâh-ı âlî yeniçerilerinin yetmiş üçüncü cemâ‘atine mahsûs odanın nukūd-ı mevkūfesine bi’l-fi‘il mütevellî olan bâ‘is-i hâze’l-kitâb Durmuş b. İvaz nâm kimesne meclis-i şer‘-i şerîf-i enver ve mahfil-i dîn-i münîf-i ezherde İbrahim Ağa b. Hüseyin nâm kimesne mahzarında üzerine da‘vâ ve takrîr-i kelâm edip mezbûr İbrahim Ağa zimmetinde yedimde olan temessük nâtık olduğu üzere mâl-ı vakf-ı mezbûrdan istidâne ve kabz eylediği yüz yetmiş beş guruşun elli guruşunu bundan akdem bana edâ ve teslîm ben dahi tevliyetim hasebiyle yedinden ahz u kabz edip yüz yirmi beş guruşu zimmetinde bâkī kalmağla taleb eylediğimde meblağ-ı bâkī-i mezbûru bana edâdan imtinâ‘ eder, hâlâ mezbûr İbrahim Ağa’ya suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûr İbrahim Ağa cevâbında fi’l-hakīka kaziyye minvâl-i muharrer üzere olup mütevellî-i mezbûra mâl-ı vakf-ı mezbûrdan bâkī zimmetimde vâcibü’l-edâ ve lâzımü’l-kazâ yüz yirmi beş guruş deynim vardır deyü bi-tav‘ihî ikrâr u i‘tirâf etmeğin mûcebince meblağ-ı bâkī-i mezbûr yüz yirmi beş guruşu mütevellî-i mezbûra edâ ve teslîme merkūm İbrahim Ağa’ya tenbîh olunup mâ-vaka‘a bi’t-taleb ketb olundu. Fi’l-yevmi’s-sâbi‘ min-Muharremi’l-harâm li-sine mi’e ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Mehmed b. Ali, el-Hâc Ali b. Receb, Ali Çelebi b. Bâli.