İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 118 Hüküm no: 103 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Paşa’nın ev kethüdası ve Sultan Selim Han Camii Vakfı mütevellisi Kara Hüseyin Ağa b. Oruç b. Receb’in İbrahim Çelebi b. Ömer’deki camiye ait küçük halıları alması Zamânında sadâret-i uzmâ olup maktûlen fevt olan Süleyman Paşa’nın ev kethudâsı ve Sultan Selim Hân -aleyhi’r-rahmetü ve’r-rıdvân- mütevellîsi olup mahmiye-i İstanbul’da Nallı Mescid kurbünde sâkin ve hâlâ Mısr-ı Kahire’de olan Kara Hüseyin Ağa b. Oruç b. Receb tarafından husûs-ı âti’l-beyâna vekâlet iddi‘â eden karındaşı Mehmed Ağa mahfil-i kazâda câmi‘-i şerîf-i mezkûrda hâlâ kayyûmbaşı olup zikri âtî eşyâya vâzı‘u’l-yed olan işbu bâ‘isü’l-vesîka İbrahim Çelebi b. Ömer mahzarında üzerine da‘vâ ve takrîr-i kelâm edip müvekkilim mezbûr Hüseyin Ağa vakf-ı mezbûra mütevellî iken on ade[d] Uşak kaliçesini vakf-ı mezbûr vekîl-i harcı işbu hâzır bi’l-meclis el-Hâc İbrahim yediyle bi’l-emâne teslîm ol dahi kabz ve câmi‘-i şerîf-i mezkûrda vaz‘ ve hıfz üzere olup lâkin mezbûr Hüseyin Ağa mârru’z-zikr kaliçeleri mezbûrdan taleb ve ahz u kabza beni tarafından vekîl etmekle ben dahi vekâlet-i mezbûreyi ba‘de’l-kabûl hâlâ onları taleb eylediğimde teslîmden imtinâ‘ eder, suâl olunup bana teslîme tenbîh olunması matlûbumdur dedikde gıbbe’s-suâl mezbûr İbrahim eşyâ-i mezkûreye ber-vech-i mübeyyen vaz‘-ı yedini ikrâr lâkin mezbûrun vekâletini inkâr edicek, müdde‘î-i mezbûrdan müdde‘âsına beyyine taleb olundukda udûl-ı müslimînden yine mahalle-i mezbûrede sâkin Abdurrahman b. Mehmed ve İbrahim b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka paşa-yı mezkûrun ev kethudâsı ve vakf-ı mezbûrun mütevellîsi olup mahalle-i mezbûre ahâlîsinden hâlâ Mısr-ı Kahire’de olan mezbûr Kara Hüseyin Ağa b. Oruç b. Receb mârru’z-zikr kaliçeleri mezbûr İbrahim Çelebi’den taleb ve da‘vâ ve ahz u kabz ve kendüye îsâle bizim huzûrumuzda karındaşı işbu mezbûr Mehmed Ağa’yı vekîl edip ol dahi kabûl etmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mezbûr Mehmed Ağa, yaprak ta‘bîr olunur dört kebîr kaliçe ve orta ta‘bîr olunur altı Uşak kaliçesini vekâlet-i mahkiyyem hasebiyle alıp kabz eyledim dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’s-sâmin mine’l-Muharremi’l-harâm li-sene mi’e ve elf. Şuhûdü’l-hâl: Mehmed Efendi b. Şeyh Mehmed Efendi el-İmâm, Ahmed Efendi b. Şeyh Mehmed el-Kayyûm, el-Hâc Yusuf b. ( ) Müezzin, Abdülkadir Efendi, Dilaver b. Abdullah, Hasan b. Musa Kayyûm, Yusuf Beşe b. Abdullah.