İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 122 Hüküm no: 110 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Mustafa Efendi b. Mustafa’nın oturduğu harap olmuş olan vakıf evi tamir ettirmesi ve yapılan masrafların keşfi Husûs-ı âti’z-zikrin mahallinde keşf ve tahrîri için sâdır olan fermân-ı âlîye imtisâlen savb-ı şer‘den bu fakīr hâssa mi‘mârlardan Mustafa Halîfe b. Dede Mehmed ile Mehmed İstanbul’da Seydî Ömer mahallesinde vâki‘ sâhibetü’l-hayrât ve’l-hasenât Hâlî nâm hâtûnun süknâsı ulemâdan bir recül-i sâliha meşrût vakfı olan menzile varıp zeyl-i kitâbda muharrerü’l-esâmî müslimîn huzûrlarnda akd-i meclis-i şer‘-i Nebevî eyledikde menzil-i mezbûreye ber-vech-i muharrer mutasarrıf olan el-Hâc Mustafa Efendi b. Mustafa meclis-i ma‘kūd-ı mezbûrda menzil-i mezbûra kıbel-i şer‘-i enverden mansûb mütevellî olan Abdülgani Efendi b. Ahmed mahzarında takrîr-i kelâm ve ta‘bîr ani’l-merâm edip işbu bir tarafdan İmâm Mehmed Efendi tasarrufunda olan vakıf menzil ve iki tarafdan merhûm Hüsam Efendi Vakfı olan odalar ve bir tarafdan tarîk-i âm ile mahdûd tahtânî iki bâb köhne oda ve bir su kuyusunu müştemil olan işbu menzil-i mezbûru ber-mûceb-i şart-ı vâkıf bundan akdem tevcîh-i hâkimü’ş-şer‘le bana tevcîh olunup lâkin menzil-i mezbûr murûr-ı eyyâm ile harâb ve mâil-i turâb olup kābil-i süknâ olmamağla mütevellî-i mezbûrun izn-i ma‘rifetiyle mâlımla nefsim için mülküm olmak üzere menzil-i mezbûrun bazı mevâzi‘ini müceddeden binâ ve imâret ve meremmete muhtâc ve lâzıme olanı imâret ve meremmet etdirmişimdir, hâlâ masrûfum keşf ve tahmîn-i sahîh ile tahmîn ve takvîm olunmak matlûbumdur dedikde gıbbe’t-tasdîki’ş-şer‘î mi‘mâr-ı mezbûr cümlenin muvâcehesinde menzil-i mezbûr mesâha olundukda tarîk-i âm tarafında vâki‘ tûlen dört zirâ‘ ve kezâlik dört zirâ‘ bi-hesâb-ı terbî‘î on altı zirâ‘ taş duvarın zirâ‘ı altmış akçeden dokuz yüz altmış akçe ve bi-hesâb-ı mezbûr otuz altı zirâ‘ sakf-ı duvar zirâ‘ı otuz akçeden cem‘an bin seksen akçe bi-hesâb-ı mezbûr yüz seksen akçe ve bi-hesâb-ı mezbûr sokak kapısı üzerinde müceddeden on iki zirâ‘ sakfın zirâ‘ı otuzar akçe, otuz altı zirâ‘ câ-yı meremmet-i sakf ma‘a akdarma zirâ‘ı beşer akçeden üç yüz altmış akçe ve asma çardakda on altı aded Rumeli yüz altmış akçe ve bi-hesâb-ı mezbûr kenîfde on iki zirâ‘ müceddeden sakfın zirâ‘ı otuz akçeden üç yüz altmış akçe ve bi-hesâb-ı mezbûr odada ve kenîfde elli altı zirâ‘ tahta perdenin zirâ‘ı yirmi beşer akçeden bin dört yüz akçe ve ber-vech-i tahmîn tathîr-i kârîz kapısı yüz elli akçe ve bir ocak davulbazı ma‘a depe üç yüz akçe ve beş aded depe camı otuz akçe ve bi-hesâb-ı mezbûr yüz altmış beş zirâ‘ akdarma kiremit ma‘a meremmet zirâ‘ı beşer akçeden sekiz yüz yirmi beş akçe ve bi-hesâb-ı mezbûr iki odanın iki yüz yirmi zirâ‘ bada? zirâ‘ı birer akçeden kezâlik iki yüz yirmi akçe ve sâir mevâzi‘-i adîdede meremmet yüz akçe min haysü’l-mecmû‘ altı bin yüz yirmi beş akçeye bâliğ olup ebniye-i mezkûre meblağ-ı mezbûrdan noksânı ile vücûda gelmek mümkün değildir deyü mi‘mâr-ı mezbûr ile sâir müslimîn icmâ‘ ve ittifâk ve bu kavl üzere vifâk ve ittihâd etmeğin mâ-hüve’l-vâkı‘ bi’t-taleb ketb olundu. Fi’l-yevmi’t-tâsi‘ aşer min-Muharremi’l-harâm li-sene mi’e ve elf. Şuhûdü’l-hâl: İmâm Mehmed Efendi b. Mehmed, Müezzin Murtaza Halîfe b. Mahmud, Müezzin Mehmed Çelebi b. Süleyman, Attâr Mustafa Çelebi b. Süleyman, Hüseyin Çelebi b. Yusuf, Kayyûm Ahmed Halîfe b. Abdullah, Ahmed Ağa b. Abdullah, Derviş Mustafa Çelebi b. Abdullah, İsmail b. Mustafa, Müslim b. Abdullah.