İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 124 Hüküm no: 111 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğin kazasından Ananya v. Bağdasar’ın kardeşi tarafından Avanis v. Kirko’ya satılan bağı geri almak istemesi Vilâyet-i Anadolu’da Eğin kazâsından olup mahmiye-i İstanbul’da Yenikapı kurbünde ekmekçi fırınında sâkin Ananya v. Bağdasar meclis-i şer‘-i şerîf-i enverde işbu bâ‘isü’l-vesîka Avanis v. Kirko nâm Ermeni muvâcehesinde üzerine da‘vâ ve takrîr-i kelâm edip mezbûr Avanis’in bundan akdem karındaşım Bağdasar nâm Ermeni’den ba‘de’l-iştirâ gāib ani’l-meclis Süleyman nâm kimesneye semen-i ma‘lûma bey‘ ve teslîm eylediği kasaba-i mezbûrede vâki‘ ma‘lûmü’l-hudûd bir kıt‘a bâğı ceddim Yagop nâm Ermeni bana hibe ve teslîm ben dahi ittihâb ve kabûl ve kabz edip bâğ-ı mezkûr mülk-i mevhûbum ve nice eyyâm ve sene zabt u tasarrufumda iken mezbûr Avanis bâğ-ı mezbûru karındaşım mezbûrdan iştirâ eylediğim mülkümdür deyü mezbûr Süleyman’a bey‘ ve teslîm ve hâlâ [bâğ-ı] mezkûre Süleyman’ın tasarrufunda olmağın mezbûr Avanis’den suâl olunsun, mûcebi icrâ olunmak matlûbumdur dedikde mârru’z-zikr bâğı zi’l-yed olan mezkûr Süleyman’dan, gayrıdan taleb ve da‘vâ meşrû‘a olmamağla mezkûr Avanis’e suâl dahi teveccüh etmeyip mezkûr Ananya bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Muharremi’l-harâm li-sene mi’e ve elf. Şuhûdü’l-hâl: İbrahim Çelebi [b.] Ahmed, Ali b. Bâli, Mehmed Çelebi Çavuş, Ebûbekir b. Hüseyin.