İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 124 Hüküm no: 112 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amid sakinlerinden Ebulkasım Efendi’nin Hüseyin Efendi b. Ali’ye rüşvet olarak verdiği parayı geri almak istemesi Medîne-i Âmid ahâlîsinden bâ‘is-i hâze’l-kitâb Ebulkasım Efendi nâm kimesne meclis-i şer‘-i şerîf-i enverde Hüseyin Efendi b. Ali mahzarında üzerine da‘vâ ve takrîr-i kelâm edip mezbûr Hüseyin Efendi’ye bundan akdem bir husûs için bi-tarîki’r-rüşve dört yüz guruşumu teslîm, ol dahi kabz edip hatta ikrâr dahi etmekle suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyin beyyine taleb olundukda udûl-ı müslimînden olup Acemzâde mahallesi sükkânından el-Hâc Ramazan b. el-Hâc Gazanfer ve medîne-i merkūme ahâlîsinden es-Seyyid İshak Çelebi b. Hüseyin nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu mezbûr Hüseyin Efendi müdde‘î-i mezbûra vech-i meşrûh üzere meblağ-ı mezbûru gasb etmemle meblağ-ı mezbûr dört yüz guruş zimmetimde vâcibü’l-edâ deynimdir deyü bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde şâhidân-ı mezbûrân taraf-ı şer‘den nâib irsâl olunup sırran ve alenen ta‘dîl ve tezkiye olunduklarından sonra şehâdetleri makbûle olmağın mûcebiyle meblağ-ı mezbûr dört yüz guruşu müdde‘î-i mezbûra edâ ve teslîm merkūm Hüseyin Efendi’ye tenbîh olunmağın mâ-vaka‘a bi’t-taleb ketb olundu. Fî evâsıtı Muharremi’l-harâm li-sene mi’e ve elf. Şuhûdü’l-hâl: Mehmed Efendi b. Mehmed, İbrahim Ağa kethudâ-yı ( ) efendi, el-Hâc Süleyman ve gayruhüm.