İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 125 Hüküm no: 114 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın eski kocası Korucu el-Hac Nasuh Beşe b. Ali b. Halil’e ait terekeye el koyan varislerden mehir hakkını alması Vilâyet-i Anadolu’da Yoros kazâsına tâbi‘ Beykoz nâm karye sükkânından iken bundan akdem vefât eden Korucu el-Hâc Nasuh Beşe b. Ali b. Halil nâm kimesnenin verâseti zevce-i menkûha-i metrûkesi Zahide bt. Hasan nâm hatun ile sulbî kebîr oğlu Mustafa ve sulbiye kebîre kızı Hatice’ye munhasıra olduğu şer‘an zâhir ve müte‘ayyin oldukdan sonra müteveffâ-yı mezbûrun zevce-i mutallakası olup zâtı ma‘rifet-i şer‘iyye ile ârifân Abdi Beşe b. Abdullah ve Mustafa Beşe b. Şükrullah ta‘rîfleriyle mu‘arrefe olan Âişe bt. Mustafa nâm hatun meclis-i şer‘-i şerîf-i enverde tereke-i müteveffâ-yı mezbûra vâzı‘u’l-yed olan mezbûrân Mustafa ve Zahide ile merkūme Hatice’nin zevc ve tarafından husûs-ı âti’z-zikri tasdîka sâbitü’l-vekâle vekîl olan Mahmud Beşe b. Abdullah mahzarlarında ikrâr ve takrîr-i kelâm edip merkūm el-Hâc Nasuh Beşe zevcim olup hayâtında beni tatlîk etmekle zimmetinde mütekarrir ve ma‘kūdün-aleyh olan dört bin akçe mehr-i müeccelim bana kable’l-edâ mezbûr el-Hâc Nasuh Beşe fevt olup terekesine mezbûrûn Mustafa ve Zahide ve Hadice vâzı‘û’l-yed olmalarıyla meblağ-ı merkūmu tereke-i müteveffâ-yı mezbûrdan merkūmûndan taleb ve da‘vâ eylediğimde beynimizde münâza‘ât-ı kesîre cereyân etmişdi. El-hâletü hâzihî muslihûn tavassut edip da‘vâ-yı mezbûrumdan merkūmûn ile beni iki bin iki yüz akçe üzerine sulh eylediklerinde ben dahi sulh-ı mezbûru kabûl ve bedel-i sulh-ı mezbûr iki bin iki yüz akçeyi yedlerinden tamâmen ahz u kabz edip ziyâdesine ve sâire müte‘allika âmme-i da‘vâdan mezbûrûnun zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: Hüseyin Çelebi b. Mehmed, Mahmud b. Mehmed, Ahmed Efendi Kâtib-i Kassâm, Abdi Beşe b. İvaz, İbrahim Çelebi b. Ahmed, Ali b. Bâli, Hüseyin b. Mehmed.