İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 127 Hüküm no: 116 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem tüccarından Mıgırdıç v. Kurt’un Fahri bt. Mehmed’deki alacağının tahsil edilmesini istemesi Acem tüccârından işbu bâ‘isü’l-vesîka Mıgırdıç v. Kurt mahfil-i kazâ-i lâzımü’r-rızâda Fahri bt. Mehmed nâm hatun mahzarında üzerine da‘vâ ve takrîr-i kelâm edip mezbûre Fahri zimmetinde yedimden iştirâ ve kabz eylediği beynimizde ilm-i şer‘î ile ma‘lûm Acem metâ‘ı bahâsından elli beş guruş hakkım olup taleb eylediğimde bana edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl mezbûre Fahri cevâbında fi’l-hakīka müdde‘î-i mezbûra cihet-i mezkûreden elli beş guruş deynim olup lâkin meblağ-ı mezbûrun otuz guruşunu hâzıra bi’l-meclis Ümmügülsüm ve on guruşunu Kerime bt. Mehmed yediyle ve on guruşunu dahi kendim edâ ve teslîm etmişdim deyü beş guruş deyni olduğunu ikrâr elli guruşu def‘le mukābele edicek, gıbbe’l-istintâk ve’l-inkâr mezbûre Fahri’den def‘-i meşrûhuna beyyine taleb olundukda ityân-ı beyyineden izhâr-ı acz ve istihlâf edicek, fi’l-hakīka meblağ-ı mezbûrun otuz guruşunu mezbûre Ümmügülsüm ve on guruşunu merkūme Kerime ve on guruşunu dahi mezkûre Fahri’den ahz u kabz etmediğine merkūm Mıgırdıç’a yemîn teklîf olundukda ol dahi hasbe’l-mes’ûl yemîn billâhillezî enzele’l-İncîle alâ İsa -aleyhisselâm- etmeğin mûcebince [25a] ba‘de’l-hükm mâ-vaka‘a bi’t-taleb ketb olundu. Fi’l-yevmi’l-hâmis aşer mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed b. Ahmed, Ali Beşe b. Bâli, Ebûbekir [b.] Hüseyin.