İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 128 Hüküm no: 118 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac İbrahim Ağa b. Kantarcı Ahmed Ağa’nın Süleyman Çavuş b. Abdullah’daki alacağı Mahmiye-i İstanbul’da Mi‘mâr Kemal mahallesi sükkânından olup hâlâ hacc-ı şerîfde olan el-Hâc İbrahim Ağa b. Kantarcı Ahmed Ağa b. Yusuf’un karındaşı ve tarafından husûs-ı âti’l-beyâna vekîl olduğu mahalle-i mezbûrede sâkin Mustafa Çelebi b. Abdullah ve Mehmed Çavuş b. Abdullah şehâdetleriyle şer‘an sâbit olan işbu bâ‘isü’l-kitâb İsmail Çelebi nâm kimesne meclis-i şer‘-i şerîf-i enverde mahmiye-i mezbûreden Hobyar mahallesinde sâkin Süleyman Çavuş b. Abdullah mahzarında üzerine da‘vâ bi’l-vekâle da‘vâ ve takrîr-i kelâm edip yedimde olan işbu deyn temessüğü nâtık olduğu üzere karındaşım mezbûr el-Hâc İbrahim Ağa’nın mezbûr Süleyman Çavuş zimmetinde müvekkilim hâl-i sıgārında vasîsi olan Mustafa Efendi yedinden istidâne ve kabz etmekle cihet-i deyn-i şer‘îden beş yüz elli guruş hakkı olup ve meblağ-ı mezbûra işbu hâzır bi’l-meclis Keresteci el-Hâc Ali b. Murad tarafından emr ve kabûlü hâviye kefâlet-i sahîha-i şer‘iyye ile kefîl olmağın hâl asîl-i mezbûr Süleyman Çavuş’a suâl olunup meblağ-ı mezbûr mukaddemâ ihâle ve tevkîl olunmağla müvekkilim için alıverilmesi matlûbumdur dedikde gıbbe’s-suâl mezbûr Süleyman Çavuş cevâbında kaziyye vech-i meşrûh üzere olup meblağ-ı mezbûr beş yüz elli guruş müvekkil-i mezbûr el-Hâc İbrahim Ağa’ya vâcibü’l-edâ zimmetinde deyni olduğunu ikrâr u i‘tirâf etmeğin mûcebince meblağ-ı mezbûr beş yüz elli guruşu müvekkil-i merkūm için vekîl-i mezbûr İsmail Çelebi’ye edâ ve teslîme mezbûr Süleyman Çavuş’a ba‘de’t-tenbîh mâ-vaka‘a bi’t-taleb ketb olundu. Fil-yevmi’t-tâsi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Ebûbekir b. Hüseyin, Ali b. Bâli, İbrahim b. Musa.