İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 128 Hüküm no: 119 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Aydın’ın küçük çocuklarının vasisi Murtaza b. Hüseyin’in çocukların Mehmed b. Yakub’un el koyduğu terekedeki haklarını alması Mahmiye-i İstanbul’da Süleymaniye kurbünde sâkin iken bundan akdem vefât eden Ali b. Aydın nâm kimesnenin evlâd-ı sıgārı Mustafa ve Hüseyin ve Abdülkerim ve Râbia ve Miyase’nin tesviye-i umûrlarına kıbel-i şer‘den vasiyy-i mansûbları olan Murtaza b. Hüseyin meclis-i şer‘de müteveffâ-yı mezbûrun terekesine vâzı‘u’l-yed olduğu mütehakkık olan Mehmed b. Yakub mahzarında bi’l-vesâye ikrâr ve takrîr-i kelâm [edip] mezbûr Mehmed’den bundan akdem vesâyetim hasebiyle müteveffâ-yı mezbûrun terekesinden olmak üzere makbûzu olan nukūd ve eşyâsını taleb ve da‘vâ eylediğimde ol dahi tereke-i müteveffâ-yı mezbûrdan olmak üzere bana nakid on iki bin sekiz yüz akçe ile eşyâsından bir çift sîm küpe ve iki köhne velençe ve bir köhne çuka demir koparan ve üç aded ...? postu ve bir asdâr kuşak ve dört köhne gömlek ve beş makrame ve iki köhne kebe ve iki tâbe ve bir tencere ve bir şalvâr ve bir delme dahi def‘ ve teslîm, ben dahi bi’l-vesâye yedinden ahz u kabz edip ba‘de’l-yevm makbûzum olan eşyâ-i mezkûreye müte‘allika da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâdî ve’l-ışrîn min-Muharremi’l-harâm li-sene mi’e [ve elf]. Şuhûdü’l-hâl: Mehmed Çelebi b. Hüseyin, Mehmed b. Kasım, İsmail Çelebi b. Murad, Hüseyin b. Yakub, Dazır Mahmud Bey.