İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 129 Hüküm no: 120 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yalakabad kasabasında vefat eden Ömer Bey b. Hızır b. Abdullah’ın varislerinin tereke ve diğer işleri görmek üzere İbrahim Bey b. Ahmed’i vasi tayin etmeleri Fi’l-asl vilâyet-i Anadolu’da Eğin kazâsına tâbi‘ Şirzu nâm karye ahâlîsinden olup mahmiye-i İstanbul’da Kumkapı kurbünde Kömürcü ( ) oldukdan sonra Yalakabad kasabasında fevt olan Ömer Bey b. Hızır b. Abdullah nâm kimesnenin verâseti zevce-i metrûkesi Âbide Hatun ile babası mezbûr Hızır’a ve vâlidesi Fâtıma Hâtûn’a ve sulbî sagīr oğlu Osman’a munhasıra olduğu şer‘an zâhir ve müte‘ayyin oldukdan sonra müteveffâ-yı mezbûrun veresesi karye-i mezbûrede olmağla mahmiye-i mezbûrede olan terekesini ve zimem-i nâsda olan hukukunu ahz u kabz ve düyûn-ı müsbetesini edâya kıbel-i şer‘den bir vasî nasb u ta‘yîn olunmak lâzım ve mühim ve işbu râfi‘ül-kitâb İbrahim Bey b. Ahmed vesâyet-i mezbûre uhdesinden gelmeğe her vechile kādir olduğunu zeyl-i kitâbda muharrerü’l-esâmî müslimîn ihbâr etmeleriyle mezbûr İbrahim Bey ber-vech-i muharrer müteveffâ-yı mezbûrun terekesini ve zimem-i nâsda olan hukukunu ahz u kabz ve düyûn-ı müsbetesini edâya kıbel-i şer‘den vasî nasb u ta‘yîn olundu. Fi’l-yevmi’s-sâmin aşer mine’l-Muharremi’l-harâm li-sene mi’e ve elf. Şuhûdü’l-hâl: Mehmed Bey b. İsmail, Ebûbekir Bey b. Hüseyin, Mustafa b. Haydar, Hüseyin Bey b. Osman, İsmail Bey b. Ahmed.