İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 130 Hüküm no: 121 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Hersek valisi olup Uyvar muhafazasında vefat eden Mustafa Paşa’nın terekesi Sâbıkā Hersek vâlîsi olup Uyvar muhâfazasındna iken bundan akdem vefât eden merhûm Mustafa Paşa’nın evlâd-ı sıgārı Mehmed Bey ve Ahmed Bey’in tesviye-i umûrları için kıbel-i şer‘-i kavîmden mansûb vekîlleri olan babaları Abdi Çelebi b. Mehmed ve Mahmud Bey’in vasiyy-i mansûbu olan kezâlik üveyi babası İmâmzâde Mehmed Çelebi meclis-i şer‘-i şerîf-i enverde merhûm müşârun-ileyhin anda terekesine vâzı‘u’l-yed olan İbrahim Ağa b. İsmail mahzarında her biri üzerine da‘vâ ve takrîr-i kelâm edip paşa-yı müşârun-ileyh vefât etdikde bazı terekesine mezbûr İbrahim Ağa vasî olmak üzere vaz‘-ı yed eyledikde ol târihde kal‘a-i mezbûrda muhâfazada olan yirmi dokuz cemâ‘atin odabaşısı olan el-Hâc Hasan Odabaşı’nın âharı tevkîliyle me’zûn olmak üzere vekîli olan İbrahim Çorbacı tarafından vekîl olan ( ) Karalı el-Hâc Hüseyin Ağa nâm kimesne medîne-i Belgrad’da müvekkil-i mezbûr el-Hâc Hasan Odabaşı’nın paşa-yı müşârun-ileyh zimmetinde cihet-i karzdan bin sekiz yüz esedî hakkı olup mukābelesinde bir mücevher hançer ve bir altın kılıç rehindir deyü mezkûr İbrahim Ağa da da‘vâ eyledikde mezbûr müdde‘âsını isbât etmeksizin zikr olunan hançer ve kılıcı ba‘de’l-müzâyede yedi yüz elli guruşa bey‘ ve meblağ-ı mezbûra eytâm mâllarından bin elli guruş dahi zam ve vekîl-i mezbûra mezkûr İbrahim Ağa teslîm etmeğin hâlâ mezkûr İbrahim Ağa’ya suâl olunup mâl-ı eytâmdan ber-vech-i meşrûh bilâ-isbât teslîm eylediği meblağı vesâyetim hasebiyle bize teslîme tenbîh olunması matlûbumdur dediklerinde gıbbe’s-suâl mezbûr İbrahim Ağa hâl bâlâda şerh u beyân ve tafsîl ü ayân olunan minvâl üzere olup bilâ-isbât-ı şer‘î hükm-i hâkimü’ş-şer‘ lâhık olmaksızın eytâm-ı mezkûra babalarından müntakil mâllarından yedi yüz elli guruş mukābelesinde zikr olunan hançer ve kılıcın bahâlarına bin elli guruş dahi zam ve mezkûr el-Hâc Hasan Odabaşı için vekîl-i mezbûra teslîm ile mâl-ı mezbûru sıgāra zımân lâzım geldiğini bi’t-tav‘ ikrâr u i‘tirâf etmeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Abdi Çelebi b. Mahmud, Ebûbekir b. Hüseyin.