İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 130 Hüküm no: 122 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Abdullah ile Hamun adlı zimmiye borcundan dolayı hapiste olan Hayim v. Bâli’nin kefaletle serbest bırakılması Havâss-ı Aliyye kazâsı muzâfâtından Hasköy’de Kiremitçi Ahmed Çelebi mahallesi sükkânından olup hâzır bi’l-meclis Ahmed Çelebi b. Abdullah’a deyn-i şer‘îden üç yüz guruş ve gāib ani’l-meclis Hamun nâm zimmîye ma‘lûmü’l-mikdâr deyni için bin doksan dokuz senesi Ramazânü’l-mübârek muntasıfından beri Sicn-i Sultânî’de mahbûs olan Hayim v. Bâli nâm Yahudi’den vech-i âtî üzere istişhâd-ı şer‘î sudûrundan sonra yine mahalle-i mezbûrede sâkin Mahmud Ağa b. İskender ve Mustafa b. Dilaver ve Mehmed b. Ali ve Cerrâh Mustafa b. Abdullah li-ecli’ş-şehâde meclis-i şer‘a hâzırûn olup fi’l-vâki‘ işbu mezkûr Hayim hâlâ üzerinde lâbis olduğu köhne libâsdan gayrı ism-i mâl ıtlâk olunur şeyi olmayıp müflis ve mu‘dim olmağla kudret-i mâla vüsûlüne değin sebîli tahliye ve habsden ıtlâk olunması lâzım idiğine biz şâhidleriz, şehâdet dahi ederiz deyü edâ-i şehâdet-i şer‘iyye eylediklerinde mezbûr Ahmed Çelebi’nin sâire beyyinesi olmamağla hâkim-i muvakkı‘-ı sadr-ı kitâb tûbâ leh ve hüsnü-meâb hazretleri mezbûrûnun şehâdetlerini ba‘de’t-ta‘dîl ve’t-tezkiye kabûl ve mezbûrun iflâsına hükm-i şer‘î ve kazâ-i mer‘î etdikden sonra mezbûr Hayim’in nefsine ve hîn-i talebde meclis-i şer‘a ihzârına babası olup yine Hasköy’de sâkin Bâli v. Yako ve Mürdehay v. Mosi nâm Yahudiler kefîl olduklarında sâdır olan fermân-ı âlîşân mûcebince kudret-i mâl [ve] vüs‘at-i hâl vusûlüne değin sebîli tahliye ve habsden ıtlâk olunup mâ-vaka‘a bi’t-taleb ketb olundu. Fi’l-yevmi’l-ışrîn min-Muharremi’l-harâm li-sene mi’e ve elf. Şuhûdü’l-hâl: Ahmed Çelebi b. Ahmed, İbrahim Çelebi b. Ahmed, Ebûbekir b. Hüseyin, Ali b. Bâli.