İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 131 Hüküm no: 123 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın mehir ve nafakasını alarak Seyyid Ali Çelebi b. Ahmed’den boşanması Mahmiye-i İstanbul’da Ali Paşa-yı Atîk kurbünde çâşnigîr odaları sâkinelerinden zâtı ma‘rifet-i şer‘iyye ile ârifân Abdurrahim Efendi b. Hüseyin Efendi ve es-Seyyid Ahmed b. Ali b. Abdurrahman ta‘rîfleriyle mu‘arrefe Safiye bt. Abdullah nâm hatun meclis-i şer‘-i şerîf-i enver ve mahfil-i münîf-i ezherde zevc-i dâhili işbu bâ‘isü’l-kitâb es-Seyyid Ali Çelebi b. Ahmed mahzarında ikrâr ve takrîr-i kelâm edip zevcim mezbûr es-Seyyid Ali Çelebi zimmetinde mütekarrir ve ma‘kūdün-aleyh altı bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr es-Seyyid Ali Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl etdiğinden sonra hukuk-ı zevciyyete müte‘allika âmme-i da‘vâdan zevcim mezbûr es-Seyyid Ali Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Hüseyin Çelebi b. Yusuf, Mehmed Çelebi b. Ahmed Efendi, Mustafa Efendi b. el-Hâc Ali, Mustafa Çelebi b. Mehmed, Hüseyin Çelebi b. Mustafa, Süleyman Efendi b. Mahmud.