İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 132 Hüküm no: 124 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küre kazası İlpelik köyünden İbrahim b. Mehmed’in tarlalarını Bayram b. Abdülkadir’e satması Vilâyet-i Anadolu’da Küre-i Nühâs kazâsına tâbi‘ İlpelik nâm karye ahâlîsinden İbrahim b. Mehmed nâm kimesne meclis-i şer‘-i şerîf-i enverde bâ‘is-i haze’l-kitâb Bayram b. Abdülkadir mahzarında ikrâr ve takrîr-i kelâm edip taht-ı tasarrufumda olup karye-i mezbûrede vâki‘ üç tarafdan Musa Halîfeoğlu tarlası ve bir tarafdan tarîk-i âm ile mahdûd Uzuntarla demekle ma‘rûf bir dönüm tarlamı ve yine karye-i mezbûrede vâki‘ bir tarafdan Musaoğlu tarlası ve bir tarafdan Maksudoğlu tarlası ve bir tarafdan Uzunoğlu tarlası ve bir tarafı tarîk-i âm ile mahdûd bir keyl tohum isti‘âb eder Fesleğen yeri demekle ma‘rûf iki kıt‘a tarlalarımı sâhib-i arz ma‘rifetiyle mezbûr Bayram’a yirmi sekiz guruş bedel mukābelesinde ferâğ ve tefvîz, ol dahi ba‘de’l-kabz ve’l-kabûl meblağ-ı mezkûr yirmi sekiz guruşu bana teslîm, ben dahi tesellüm ve kabz edip mârru’z-zikr tarlalar mezkûr Bayram’ın hakk-ı müfevvezi olmuşdur dedikde gıbbe’t-tasdîki’l-mu‘teber mâ-hüve’l-vâkı‘ bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: Resul b. Maksud, Satılmış b. Mehmed, Mehmed b. Şaban, İbrahim Çelebi b. Ahmed, Hüseyin Çelebi b. Mehmed, Hüseyin b. Mehmed.