İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 132 Hüküm no: 125 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. Solak Ömer Ağa’nın cariye olarak Kerelona bt. Yoseb’den satın aldığı Ayşe’nin hür olduğunu ispat etmesi İşbu orta boylu, açık kaşlı, elâ gözlü Âişe nâm mevsûfe meclis-i şer‘-i şerîf-i enverde kendüye rık olmak üzere vâzı‘atü’l-yed olan Fâtıma Hatun bt. Solak Ömer Ağa tarafından husûs-ı âti’l-beyâna vekîl-i müsecceli olan Şaban Efendi b. Receb mahzarında üzerine da‘vâ ve takrîr-i kelâm edip ben mahmiye-i İstanbul’da Edirnekapısı kurbünde Çukurbostan mahallesi sükkânından işbu Osman b. Oruç nâm kimesnenin firâşından hâsıla ve zevce-i menkûhası Kerime bt. Halil nâm hürretü’l-asl hâtûndan mütevellide sulbiye kızı olup bana ve ebeveynime kat‘â rık târî olmayıp hürrü’l-asl olmuş iken hâlâ müvekkile-i mezbûre bana rık olmak üzere bi-gayrı hakkın vaz‘-ı yed eder, vekîl-i mezbûra suâl olunup müvekkilesi üzerimden yed-i mubtılasını kasr ve sebîlim tahliye olunmak matlûbumdur dedikde gıbbe’s-suâl vekîl-i mezbûr Şaban Efendi cevâbında bundan akdem işbu hâzır bi’l-meclis Kerelona bt. Yoseb nâm Yahudiye mevsûfe-i mezbûre Âişe’yi Çerkesiyyetü’l-asl olup müvekkili el-Hâc Hüseyin nâm kimesnenin câriye-i memlûkesidir deyü müvekkilem mezbûre Fâtıma Hâtûn’a yüz on guruşa bey‘ ve teslîm, ol dahi iştirâ ve tesellüm ve semen-i mezbûr mezbûre Âişe mahalle-i mezbûre sükkânından işbu mezbûr Osman b. Oruç’un firâşından hâsıla ve zevce-i menkûha-i mezbûre Kerime bt. Halil nâm hürrü’l-asl hâtûndan mütevellide sulbiye kızıdır, mevsûfe-i mezbûre Âişe’ye ebeveynine kat‘â rık târî olmuş değildir, hürrü’l-asıldır, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olup mûcebince mevsûfe-i mezbûre Âişe’nin hürriyetine ba‘de’l-hükmi’ş-şer‘ vekîl-i mezbûr Şaban Efendi müvekkilesi merkūme Fâtıma Hâtûn’un semeni deyü medfû‘u olan meblağ-ı mezbûr yüz on guruşu bâyi‘a-i mezbûre Kerelona’dan bi’l-vekâle taleb ve da‘vâ eyledikde mezbûre Kerelona cevâbında fi’l-hakīka mevsûfe-i mezbûre Âişe’yi ber-vech-i meşrûh kendi vekâleten yüz on guruşa [26b] mezbûre Fâtıma Hâtûn’a bey‘ ve teslîm ve semen-i mezbûru ahz u kabz eylediğini ikrâr u i‘tirâf etmekle meblağ-ı mezbûr yüz on guruş müvekkile-i mezbûre Fâtıma Hatun için vekîl-i merkūm Şaban Efendi’ye redd ü teslîme mezbûre Kerelona’ya tenbîh olunup mâ-hüve’l-vâkı‘ bi’t-taleb ketb olundu. Fi’l-yevmi’s-sânî aşer mine’l-Muharremi’l-harâm li-sene mi’e ve elf. Şuhûdü’l-hâl: Mehmed Efendi b. İbrahim, el-Hâc Ahmed b. İbrahim, İbrahim Çelebi b. Ahmed, Mehmed Çelebi b. İbrahim, Ebûbekir b. Hüseyin.