İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 133 Hüküm no: 126 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun bt. Mahmud b. Şahbali’nin hayatta iken mehir ve terekesini kocası Mehmed b. Abdullah’a hibe etmiş olduğu Mahmiye-i İstanbul’da Derviş Ali mahallesi sâkinelerinden iken bundan akdem vefât eden Saliha Hatun bt. Mahmud b. Şahbali’nin verâseti zevc-i metrûkü Mehmed b. Abdullah ile li-ebeveyn er karındaşı diğer Mehmed ve kız karındaşları Fâtıma ve Ünzile nâm hâtûnlara munhasıra olduğu şer‘an zâhir ve mütehakkık oldukdan sonra mezbûr diğer Mehmed meclis-i şer‘-i şerîfde işbu sâhibü’l-vesîka zevc-i merkūm Mehmed mahzarında üzerine da‘vâ ve takrîr-i kelâm edip mûrisimiz müteveffât-ı mezbûrenin zevc-i mezbûr zimmetinde ma‘kūdün-aleyh olan altı yüz akçe mehr-i müecceli ve sâir terekesinden hisse-i irsiyyemi merkūmdan taleb eylediğimde teslîmden imtinâ‘ eder, suâl olunup teslîme tenbîh olunmak matlûbumdur dedikde gıbbe’s-suâl mezbûr Mehmed cevâbında zevcem mezkûre Saliha mukaddemâ hâl-i hayâtında ve kemâl-ı akl-ı sıhhatinde zimmetimde mehri olan meblağ-ı mezbûr ile kalîl ve kesîr ism-i mâl ıtlâk olunur terekesini bana hibe-i sahîha-i şer‘iyye ile hibe ve teslîm, ben dahi ittihâb ve kabûl edip hatta lâbise olduğu köhne palâsından gayrı ism-i mâl ıtlâk olunur şeyi olmadığını lede’ş-şuhûd ikrâr ve işhâd dahi etmişdir deyü def‘le mukābele edicek, gıbbe’l-istintâk ve’l-inkâr merkūm Mehmed’den def‘-i mezbûruna beyyine taleb olundukda yine mahalle-i mezbûre sükkânından ve zât-ı müteveffât-ı mezbûreyi ma‘rifet-i şer‘iyye ile ârifân olan Ali Efendi b. Abdüssamed ve Mahmud b. Abdülmuttalib nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffât-ı mezbûre Saliha Hatun bt. Mahmud b. Şahbali hâl-i hayâtında ve kemâl-ı âfiyetinde altı yüz akçe mehr-i müecceli ile kalîl ve kesîr ism-i mâl ıtlâk olunur terekesini zevc-i mezbûr Mehmed’e hibe-i sahîha-i şer‘iyye ile hibe ve teslîm, ol dahi meclis-i hibede ittihâb ve kabûl edip hatta lâbise olduğum işbu köhne libâsdan gayrı ism-i mâl ıtlâk olunur nesnem yokdur deyü bizim huzûrumuzda ikrâr ve işhâd etmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr diğer Mehmed bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’t-tâsi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Hüseyin b. Mustafa, Ebûbekir b. Hüseyin, Hüseyin b. ( ) ve gayruhüm mine’l-huzzâr.