İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 134 Hüküm no: 127 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afyon Karahisarlı İbrahim Efendi b. Mustafa’nın terekesi hakkında varislerin sulh olarak birbirlerinin zimmetlerini ibra etmeleri Fi’l-asl vilâyet-i Anadolu’da Afyon Karahisârı ahâlîsinden olup mahmiye-i İstanbul’da Çerağî Hasan mahallesinde sâkin iken bundan akdem vefât eden İbrahim Efendi b. Mustafa’nın verâseti li-ebeveyn er karındaşları Mustafa Çelebi ve Küçük nâm kimesnelere ve li-ebeveyn kız karındaşı Ümmühânî’ye munhasıra olduğu şer‘an zâhir ve müte‘ayyin oldukdan sonra mezbûr Mustafa Çelebi meclis-i şer‘-i şerîf-i enverde işbu bâ‘isü’l-kitâb ammi Mehmed Çelebi b. Mustafa mahzarında bi’t-ta‘i’s-sâf ikrâr-ı sahîh-i şer‘î ve i‘tirâf-ı sarîh-i mer‘î kılıp mûrisimiz mezkûr İbrahim Efendi fevt oldukda mecmû‘-ı terekesin mezkûr Mehmed Çelebi’ye hâl-i hayâtında emânet vaz‘ eylediği yüz elli guruşu ben kabz ve tesellüm eylediğimden sonra meblağ-ı mezbûr ile müteveffâ-yı mezbûrun sâir terekesin mezkûrân Küçük ve Ümmühânî Hatun ile iktisâm ve her biri hisse-i irsiyyesini kabz ve tereke-i müteveffâ-yı mezbûra müte‘allika âmme-i de‘âvî ve muhâsamâtdan herbirimiz âharı ibrâ ve ıskāt etmişdik, meblağ-ı mezbûr yüz elli esedî guruş ber-vech-i mastûr makbûzum olup müteveffâ-yı mezbûrun terekesinden ammim mezkûr Mehmed Çelebi yedinde ve zimmetinde bir akçe ve bir habbe ve bir şey olmayıp müteveffâ-yı mezbûrun terekesine ve sâir ahz u i‘tâ ve mu‘âmelât-ı şettâya müte‘allika âmme-i de‘âvî ve muhâsamât ve eymân ve mütâlebâtdan mezkûr Mehmed Çelebi’yi ibrâ-i âmm-ı kātı‘u’n-nizâ‘la ibrâ ve ıskāt eyledim, min ba‘d da‘vâ ve nizâ‘ım kalmamışdır dediğinde gıbbe’t-tasdîki’l-mu‘teberi’l-vicâhî mâ-vaka‘a bi’t-taleb ketb olundu. Fi’l-yevmi’s-sâbi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: Halil Efendi b. Mustafa, Abdi Efendi b. eş-Şeyh Ahmed, Mehmed Çelebi b. Abdullah Efendi, Hasan Çelebi b. Şaban, Eyüb Beşe b. Abdullah, Hasan Ağa b. Abdullah, Selim Odabaşı b. Davud, el-Hâc Süleyman b. Hasan, el-Hâc Mehmed b. Hüseyin, Ebûbekir Beşe b. Musli ve gayruhüm mine’l-huzzâr.