İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 135 Hüküm no: 128 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Abdullah b. Mehmed’in tasarrufundaki harap olmuş olan vakıf evi vakfın mütevellisi Müezzin el-Hac Mustafa b. Abdullah’ın izniyle tamir ettirmesi Husûs-ı âti’z-zikrin mahallinde ketb u tahrîri için sâdır olan fermân-ı âlîye imtisâlen savb-ı şer‘den irsâl olunan İbrahim Efendi b. Mehmed el-Hamidî ol dahi Hâssa mi‘mârlardan Mustafa Halîfe b. Dede Mehmed ile mahmiye-i İstanbul’da Deniz Abdal mahallesinde ashâb-ı hayrâtdan ( ) nâm kimesnenin süknâsı bir recül-i sâliha meşrût vakfı olup mahalle-i mezbûrede vâki‘ el-Hâc Abdullah b. Mehmed’in taht-ı tasarrufunda olan zikri âtî vakıf menzile varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i Nebevî eyledikde mezbûr el-Hâc Abdullah meclis-i ma‘kūd-ı mezbûrda menzil-i mezbûra kıbel-i şer‘den mansûb mütevellî olan mahalle-i mezbûre sükkânından Müezzin el-Hâc Mustafa b. Abdullah mahzarında takrîr-i kelâm ve ta‘bîr ani’l-merâm edip işbu bir tarafdan Haremeyni’ş-şerîfeyn Vakfı’ndan el-Hâc Mehmed tasarrufunda olan vakıf menzil ve iki tarafdan mahalle-i mezbûre imâmı ve müezzinine meşrûta vakıf menzil ve bir tarafdan tarîk-i âm ile mahdûd tahtânî iki bâb köhne oda ve bir sofa ve kenîfi müştemil olan menzil-i mezbûr bundan akdem ber-mûceb-i şart-ı vâkıf tevcîh-i hâkimü’ş-şer‘le bana tevcîh olunup lâkin menzil-i mezbûr murûr-ı eyyâm ile harâba müşrif olup kābil-i süknâ olmamağla bundan akdem izn-i mütevellî-i mezbûr ma‘rifet-i şer‘le menzil-i mezbûru mâlımla nefsim için mülküm olmak üzere bazı mevâzi‘ini müceddeden binâ ve imârete muhtâce olan mevâzi‘i imâret ve meremmet etdirmişimdir, hâlâ masrûfum keşf ve tahmîn-i sahîh ile tahmîn ve takvîm olunmak matlûbumdur dedikde gıbbe’t-tasdîki’ş-şer‘î mi‘mâr-ı mezbûr cümlenin muvâcehesinde mesâha eyledikde tûlen on sekiz zirâ‘ ve kadden dört zirâ‘ bi-hesâb-ı terbî‘î yetmiş iki zirâ‘ kerpiç ve taş ile mahlût arşın duvarın zirâ‘ı ellişer akçeden cem‘an üç bin altı yüz akçe ve bi-hesâb-ı mezbûr kırk iki zirâ‘ sokak tarafında vâki‘ taş duvarın zirâ‘ı yetmiş akçeden iki bin dokuz yüz kırk akçe ve bir sokak kapısı üç yüz akçe ve bi-hesâb-ı mezbûr iki bâb köhne mârru’z-zikr odalarda yüz on iki zirâ‘ câ-yı meremmet sakfın zirâ‘ı beşer akçeden beş yüz altmış akçe ve bi-hesâb-ı mezbûr otuz altı zirâ‘ sakf duvar zirâ‘ı yirmi beşer akçeden dokuz yüz akçe ve bi-hesâb-ı mezbûr otuz zirâ‘ dolma duvarın zirâ‘ı otuzar akçeden dokuz yüz akçe ve bir mücedded matbah ocağı bin akçe ve iki aded ağaç pencere yüz akçe ve bi-hesâb-ı mezbûr on iki zirâ‘ tahta döşemenin zirâ‘ı yirmişer akçeden iki yüz kırk akçe ve beş aded lengeli araf yüz akçe ve iki bâb meremmet-i kapı ma‘a pencere yüz elli akçe ve bi-hesâb-ı mezbûr yüz on yedi zirâ‘ iki bâb odada ak sıvanın zirâ‘ı sekizer akçeden dokuz yüz otuz altı akçe ve üç aded sofada yama direği kırk beş akçe min haysü’l-mecmû‘ on bir bin yedi yüz yetmiş bir akçeye bâliğ olup meblağ-ı mezbûrdan noksân ile ebniye-i mezbûre vücûda gelmek mümkün değildir deyü mi‘mâr-ı mezbûr ile sâir müslimîn icmâ‘ ve ittifâk ve bu kavl üzerine vifâk ve ittihâd etmeğin vâki‘-i hâli mevlâna-yı mezbûr mahallinde ketb u tahrîr, ba‘dehû ma‘an irsâl olunan Selim b. Abdullah ve İsmail b. Mustafa ile mahfil-i şer‘a gelip alâ vukū‘ihî inhâ ve takrîr etmeğin mâ-hüve’l-vâkı‘ ketb olundu. Fi’l-yevmi’r-râbi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: Yusuf Çelebi b. Abdullah, Ahmed Çelebi b. Cafer, el-Hâc Mehmed Ağa b. Ahmed, İsmail b. Mustafa Muhzır, Salim b. Abdullah, el-Hâc Ahmed b. Seydî ve gayruhüm mine’l-huzzâr.