İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 136 Hüküm no: 129 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ahmed’in cariyesi Mülayim bt. Abdullah’ı azat etmesi Husûs-ı âti’l-beyânın mahallinde tahrîr iltimâs olunmağın savb-ı şer‘-i şerîfden Mevlânâ Abdurrahim b. Hüseyin Efendi irsâl olunup ol dahi Mehmed Efendi b. Ahmed nâm kimesnenin mahmiye-i İstanbul’da Zeyrek mahallesinde sâkin olduğu menziline varıp zeyl-i kitâbda muharrerü’l-esâmî olan müslimîn huzûrlarında akd-i meclis-i şer‘-i mübîn eyledikde mezbûr Mehmed Efendi’nin karındaşı ve tarafından husûs-ı âti’l-beyâna vekîl olduğu İbrahim Efendi b. Mehmed Efendi ve Hasan Efendi b. Mehmed Efendi şehâdetleriyle şer‘an sâbit olan Ali Efendi meclis-i ma‘kūd-ı mezbûrda ikrâr ve takrîr-i kelâm edip müvekkilim mezbûr Mehmed Efendi kendüye rıkkıyyetini mu‘terife olan işbu orta boylu, sarı, elâ gözlü ve sarı açık kaşlı Rusiyyetü’l-asl bâ‘isetü hâze’l-kitâb Mülayim bt. Abdullah nâm câriyesini târih-i kitâbdan bir sene mukaddem hasbeten lillâhi’l-meliki’l-hallâk ve taleben li-merzâti’r-rezzâk mâlımdan tahrîr ve i‘tâk ve zümre-i harâir-i asliyyâta idrâc ve ilhâk eyledi, ba‘de’l-yevm mevsûfe-i mezbûre Mülayim târih-i mezbûrdan berü sâir harâir-i asliyyât gibi hür olup üzerinde müvekkilim mezbûr Mehmed Efendi’nin velâ-yı şer‘îden gayrı hakkı bâkī kalmadı dedikde vâki‘-i hâli mevlânâ-yı mezbûr mahallinde tahrîr ve ma‘an irsâl olunan el-Hâc Ali b. Abdullah ile meclis-i şer‘a gelip alâ vukū‘ihî inhâ ve takrîr etmeğin mâ-hüve’l-vâkı‘ bi’t-taleb ketb olundu. Fi’l-yevmi’s-sâdis aşer min-Muharremi’l-harâm li-sene mi’e ve elf. Şuhûdü’l-hâl: Fahrü’l-müderrisîn Abdullah Efendi, Abdülkadir Efendi el-İmâm, Fahrü’l-müderrisîn Hüseyin Efendi, el-Hâc Abdi, İshak Çelebi b. el-Hâc Abdi, Osman Efendi b. Mehmed Efendi.