İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 137 Hüküm no: 130 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın mehir ve nafakasını alarak kocası Mustafa b. Abdullah’dan boşanması Mahmiye-i İstanbul’da Hadice Sultan mahallesinde sâkine olup zâtı ma‘rifet-i şer‘iyye ile ârifân İbrahim Beşe b. Şaban ve Hüseyin b. Beşe b. Hasan nâm kimesneler ta‘rîfleriyle mu‘arrefe olan Fâtıma bt. Abdullah nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-kitâb Mustafa b. Abdullah nâm kimesne mahzarında ikrâr ve takrîr-i kelâm edip mezbûr Mustafa ile beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan bin yüz akçe mehr-i müeccelim ve nafaka-i iddet-i ma‘lûmem üzerine ve me’ûnet-i süknâm dahi kendi üzerime olmak üzere mezbûr Mustafa ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra hukuk-ı zevciyyete müte‘allika âmme-i da‘vâdan herbirimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sânî aşer min-Zilka‘de li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. Ruşen, Hüseyin Beşe b. Hasan, Ali b. Bâli, İbrahim Beşe b. Şaban, Hüseyin Beşe b. ( ).