İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 137 Hüküm no: 131 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Hırsafi’nin Mirahor mahallesindeki evini Ahmed Bey Vakfı’na satması Mahmiye-i İstanbul’da Mirahor mahallesinde sâkin Dimo v. Hırsafi nâm zimmî meclis-i şer‘-i şerîfde merhûm Ahmed Bey nâm sâhibü’l-hayr vakfına bi’l-fi‘il mütevellî olan işbu râfi‘ü’l-kitâb Ahmed Efendi b. İsmail Efendi mahzarında ikrâr ve takrîr-i kelâm edip mahalle-i mezbûrda vâki‘ bir tarafdan Yorgi nâm zimmî mülkü ve bir tarafdan Debbâğ Musa nâm kimesne mülkü ve bir tarafdan Manuk nâm zimmî mülkü ve bir tarafdan tarîk-i âm ile mahdûd mülk menzilimi cümle-i tevâbi‘ ve levâhıkı ile mütevellî-i mûmâ-ileyh Ahmed Efendi’ye tâmmü’l-vezn elli kıt‘a riyâlî guruşa bey‘ ve teslîm ol dahi mâl-ı vakf-ı mezbûr ile bi-tarîki’l-istiğlâl iştirâ ve tesellüm ve kabz edip semeni olan meblağ-ı mezbûr elli guruşu mütevellî-i müşârun-ileyh Ahmed Efendi yedinden bi’t-tamâm alıp kabz eyledikden sonra mütevellî-i mûmâ-ileyh Ahmed Efendi menzil-i mahdûd-ı mezbûru gıbbe’t-tahliyyeti’ş-şer‘î ve’t-tekābuzi’l-mer‘î târih-i kitâbdan üç sene tamâmına değin on sekiz guruş üç rub‘ guruşa bana îcâr ve teslîm ben dahi ber-vech-i muharrer üzere istîcâr ve kabûl eyledim dedikde gıbbe’t-tasdîki’ş-şer‘î menzil-i mahdûd-ı mezbûrun derkine ve şer‘an lâzım gelen ücret-i merkūmeye mahmiye-i mezbûrda el-Hâc Hüseyin mahallesinde sâkin Anastas v. Yani nâm zimmî ve mezbûr Dimo’nun zevcesi Kıymet bt. Askoli nâm nasrâniye emr ve kabûlü hâvî kefâlet-i sahîha-i şer‘iyye ile kefîl olduk dediklerinde mâ-vaka‘a bi’t-taleb ketb olundu. Fî gurreti Muharremi’l-harâm li-sene mi’e ve elf. Şuhûdü’l-hâl: Şeyh Ahmed Efendi b. Hamza, Abdülkadir Efendi b. İsmail, Seyyid Abdullah Efendi b. es-Seyyid Hasan Efendi el-İmâm, Halil Çelebi b. İlyas, Mustafa el-Müezzin, İsmail b. Ahmed el-Müezzin.