İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 138 Hüküm no: 132 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pirinççi köyünden Fatma b. Abdurrahman’ın yarısına sahip olduğu evdeki hissesini diğer yarıya sahip olan Mustafa b. Abdullah’a satması Havâss-ı Refî‘a kazâsı muzâfâtından Terkos nâhiyesine tâbi‘ Pirinççi nâm karye sâkinelerinden Fâtıma bt. Abdurrahman nâm hâtûnun zevci ve tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân es-Seyyid Abdurrahman Çelebi b. Üveys ve Ahmed Çelebi b. Hüseyin şehâdetleriyle şer‘an sâbit olan Mustafa Çelebi b. Mehmed nâm kimesne meclis-i şer‘-i şerîf-i enverde yine karye-i mezbûre sükkânından işbu sâhibü’l-kitâb diğer Mustafa b. Abdullah mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin nısfı müvekkilem mezbûre Fâtıma’nın ve nısf-ı âharı müşterî-i mezbûr diğer Mustafa’nın mülkleri olup karye-i mezbûrede vâki‘ bir tarafdan el-Hâc İsmail nâm kimesne mülkü ve bir tarafdan es-Seyyid Abdurrahman mülkü ve bir tarafdan Mehmed Beşe mülkü ve bir tarafdan tarîk-i âm ile mahdûd fevkānî ve tahtânî dört bâb oda ve bir mikdâr havlu ve bir su kuyusu ve bir fırını ve kenîfi müştemil mülk menzilde olan nısf hisse-i şâyi‘ası müvekkilem mezbûre Fâtıma mezbûr diğer Mustafa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz esedî guruşa bey‘ [28a] ve temlîk ve mahallinde teslîm, ol dahi ber-vech-i muharrer temellük ve tesellüm eyledikden sonra semeni olan meblağ-ı mezbûr otuz esedî guruşu müvekkilem mezbûre mezbûr Mustafa yedinden tamâmen ahz u kabz edip ba‘de’l-yevm menzil-i mahdûd-ı mezkûrun cümlesi mezbûr Mustafa’nın mülk ve hakkı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sânî ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: Ramazan b. Mehmed, Ömer Çelebi b. Abdullah, Mehmed Çelebi b. Hüseyin, Ali Çelebi b. Musa.