İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 138 Hüküm no: 133 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ali b. es-Seyyid Mehmed’in babasından intikal edip emaneten Hüseyin Efendi b. Ahmed’in elinde bulunan miras hissesini teslim alması Mahmiye-i İstanbul’da Ali Paşa-yı Atîk mahallesi sükkânından es-Seyyid Ali b. es-Seyyid Mehmed nâm sagīrin tesviye-i umûruna kıbel-i şer‘den mansûb vasîsi olan ammisi Osman b. Mehmed meclis-i şer‘-i şerîf-i enverde işbu râfi‘ü’l-kitâb Hüseyin Efendi b. Ahmed mahzarında takrîr-i kelâm edip bundan akdem mezbûr Hüseyin Efendi sagīr-i mezbûrun babası müteveffâ es-Seyyid Mehmed’in ve vâlidesi müteveffât Âişe bt. Mustafa nâm hâtûnun işbu yedimde olan defter-i kassâm nâtık olduğu üzere dokuz bin beş yüz kırk üç akçeye bâliğ terekelerini bi’l-emâne kabz etmişidi, hâlâ mezbûr Hüseyin Efendi meblağ-ı mezbûru bana def‘ ve teslîm, ben dahi vesâyetim hasebiyle sagīr-i mezbûr için mezbûr Hüseyin Efendi yedinden tamâmen ahz u kabz eyledim, fîmâ-ba‘d müteveffiyân-ı mezbûrân terekelerinden sagīr-i mezbûra âid merkūm Hüseyin Efendi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Muharremi’l-harâm li-sene mi’e ve elf. Şuhûdü’l-hâl: Ahmed b. Mehmed, Yusuf Çelebi b. Murad, es-Seyyid Mustafa, Ali b. Halil, İbrahim Çelebi [b.] Ahmed.