İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 139 Hüküm no: 134 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Mustafa’nın Çerağî Hasan mahallesindeki evini kocası Mustafa Çelebi’ye satması Mahmiye-i İstanbul’da Akşemseddin mahallesinde sâkine olup zâtı ma‘rifet-i şer‘iyye ile ârifân Halil Efendi b. Mustafa ve Hüseyin Ağa b. Abdullah ta‘rîfleriyle mu‘arrefe olan Afife bt. Mustafa nâm hatun meclis-i şer‘-i şerîf-i enverde hâlâ zevci olan işbu bâ‘isü’l-kitâb Mustafa Çelebi mahzarında bi’t-tav‘i’s-sâf ikrâr u i‘tirâf edip akd-i âtî sudûruna değin silk-i mülk-i sahîhimde münselik olup mahmiye-i mezbûrede Çerağî Hasan mahallesinde vâki‘ bir tarafdan bazen İsmihan Hatun mülkü ve bazen el-Hâc Evhad Vakfı ve bir tarafdan el-Hâc Mustafa mülkü ve bir tarafı Mâlcı Evhad Abdurrahman Çelebi mülkü ve bir tarafı tarîk-i âm ile mahdûd, dâhiliyyesi fevkānî iki oda ve bir sofa ve bir matbah ve bir kilâr ve zât-ı eşcâr-ı müsmire ve gayr-ı müsmire bahçe ve kenîf ve hâriciyyesi tahtânî bir oda ve ahırı müştemil mülk menzilimi bi-cümleti’t-tevâbi‘ ve’l-levâhık dört yüz esedî guruşa zevcim mezbûr Mustafa Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr dört yüz esedî guruşu yedinden tamâmen alıp kabz ve tesellüm eyledim, ba‘de’l-yevm menzil-i mahdûd-ı mezbûr mezkûr Mustafa Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ aşer min-Muharremi’l-harâm li-sene mi’e ve elf. Şuhûdü’l-hâl: Abdi Efendi b. eş-Şeyh Ahmed el-İmâm, Mehmed Çelebi b. Abdi Efendi, Halil Efendi b. Mustafa, Eyüb Beşe b. Abdullah, Hüseyin Çelebi b. Şaban, Hüseyin Ağa b. Abdullah.