İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 140 Hüküm no: 135 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Mustafa’nın Akşemseddin mahallesindeki evini hanımı Afife bt. Mustafa’ya satması Mahmiye-i İstanbul’da Çerağî Hasan mahallesinde sâkin Mustafa Çelebi b. Mustafa meclis-i şer‘-i şerîf-i enverde hâlâ zevcesi olan işbu bâ‘isetü’l-kitâb Afife bt. Mustafa nâm hatun mahzarında ikrâr-ı tâm ve takrîr-i kelâm edip bundan akdem Akşemseddin mahallesinde vâki‘ ma‘lûmü’l-hudûd mülk menzilini mezkûre Afife’ye semen-i ma‘lûma bey‘ ve teslîm ve semen-i mezkûrdan üç yüz guruşunu vasî el-Hâc İbrahim’e teslîm için yedinde ibkā, mâ‘adâsını yedinden alıp kabz edip meblağ-ı mezbûr üç yüz guruşdan gayrı mezbûr Afife’de bir akçe ve bir habbe hakkım kalmayıp ve menzil-i mezbûrda ve içinde olan esâs-ı beyt ve evânî-i nühâsiyye ve gayrıda benim alâka [ve] hakkım ve hâlâ üzerimde lâbis olduğum libâsdan gayrı zevcem mezbûrede bir şeyim yokdur dedikde gıbbe’t-tasdîki’ş-şer‘î mezbûr Mustafa Çelebi meclis-i şer‘de ammi Mehmed Çelebi b. Mustafa mahzarında ikrâr u i‘tirâf edip mezbûre Afife’de ibkā eylediğim üç yüz guruşu mezbûreden alıp dâyinim vasiyy-i mezbûr el-Hâc İbrahim’e teslîm ve rehn olan menzili fek ve kabza mezbûr Mehmed Çelebi’yi vekîl eyledim dedikde ol dahi kabûl ve merâsimini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li-sene mi’e ve elf. Şuhûdü’l-hâl: Selim Odabaşı b. Davud, el-Hâc Süleyman b. Hüseyin, el-Hâc Hüseyin b. ( ), el-Hâc Hüseyin b. Mehmed, Ebûbekir b. Musli, Mehmed Çelebi b. Osman, Abdurrahman Çelebi b. İbrahim, Osman Beşe b. Salih.