İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 140 Hüküm no: 136 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Mustafa’nın Akşemseddin mahallesindeki evini hanımı Afife bt. Mustafa’ya satması Mahmiye-i İstanbul’da Çerağî Hasan mahallesinde sâkin Mustafa Çelebi b. Mustafa meclis-i şer‘-i şerîf-i enverde hâlâ zevcesi olan işbu bâ‘isü’l-kitâb Afife bt. Mustafa nâm hatun mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup mahmiye-i mezbûrede Akşemseddin mahallesinde vâki‘ bir tarafı merhûm Müşebbek Mehmed Ağa Vakfı ve bir tarafı Ahmed Çelebi mu‘allimhânesi ve iki tarafı tarîk-i âmma müntehî hâriciyyesi bir bâb oda ve bir ahır ve dâhiliyyesi üç bâb fevkānî oda ve üç sofa ve bir sagīr hamam ve bir matbah ve bi’r-i mâ’ ve zât-ı eşcâr-ı müsmire ve gayr-i müsmire bahçe ve kenîf ve havluyu müştemil mülk menzilimi cemî‘ tevâbi‘ ve levâhıkı ile zevcem mezbûr Afife’ye yedi yüz yirmi beş guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr üç yüz guruşu vasî el-Hâc İbrahim nâm kimesneye olan ol mikdâr deynim için mezbûre yedinde ibkā ve yüz seksen guruşunu mezbûreden kabz ve elli sekiz cemâ‘atin mütevellîsi Selim Odabaşı’ya teslîm ve mâ‘adâ iki yüz kırk beş guruşu yedinden alıp kabz ve tesellüm eyledim, fîmâ-ba‘d menzil-i mezbûr mezkûre Afife’nin mülk-i müşterâsı ve hakk-ı sırfı olup menzil-i mezbûrda benim kat‘â alâka ve medhalim kalmamışdır dedikde gıbbe’t-tasdîki’ş-şer‘î ve’t-tahkīki’l-mer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: Abdi Efendi el-İmâm b. Şeyh Ahmed, Mehmed Çelebi b. Abdi Efendi, Hüseyin Çelebi b. Şaban, Halil Efendi b. Mustafa, Eyüb Beşe b. Abdullah, Hüseyin Ağa b. Abdullah, Selim Odabaşı b. Davud, el-Hâc Süleyman b. Hüseyin.