İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 141 Hüküm no: 138 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalender bt. Abdullah’ın sahip olduğu eşyalarını kocası Receb Usta b. Ali’ye satması Mahmiye-i İstanbul’da Tevkī‘i Cafer mahallesi sâkinelerinden olup zâtı ma‘rifet-i şer‘iyye ile ârifân el-Hâc Süleyman b. Abdullah ve Ahmed Çelebi b. Ömer nâm kimesneler ta‘rîfleriyle mu‘arrefe Kalender bt. Abdullah nâm hatun meclis-i şer‘-i şerîf-i enverde zevc-i dâhili işbu râfi‘ü’l-kitâb Receb Usta [b.] Ali mahzarında ikrâr ve takrîr-i kelâm edip zevcim mezbûr Receb Usta zimmetinde mütekarrir ve ma‘kūdün-aleyh sekiz yüz akçe mehr-i müeccelimin dört yüz akçesini kendüye hibe-i sahîha-i şer‘iyye ile hibe, ol dahi meclis-i hibede ittihâb ve kabûl etdikden sonra eşyâ-i memlûkemden bir döşek ve dört beledî yastık ve altı köhne minder ve iki köhne yan keçesi ve iki köhne kaliçe ve iki tencere ve üç sahan ve bir ibrik ma‘a leğen ve bir sagīr kahve ibrik ve bir ayaklı köhne sepet sandığı ve bir güğümümü zevcim mezbûr Receb Usta’ya safka-i vâhide ile bin akçe[ye] bey‘ ve teslîm, ol dahi ber-vech-i muharrer iştirâ ve kabûl etdikden sonra semeni [olan] meblağ-ı mezbûr bin akçeden zevcim mezbûr Receb Usta’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim, ba‘de’l-yevm eşyâ-i mezkûrede benim kat‘â alâka ve medhalim yokdur, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Fahrü’l-kuzât Mustafa Efendi, Süleyman Efendi b. Mehmed, Osman Efendi b. Receb, el-Hâc Mehmed b. Vakkas, el-Hâc Musli b. Abdullah, Usta Osman b. Hanife, Oruç Beşe b. Mehmed, Mustafa b. Süleyman, Mehmed b. Süleyman, Turşucu Musli.