İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 142 Hüküm no: 139 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Ali’nin cariyesi Gülistan b. Abdullah’ı azat etmesi Mahmiye-i İstanbul’da Başçı Hacı mahallesinde sâkin İbrahim Çelebi b. Ali tarafıdan husûs-ı âti’l-beyâna vekîl olduğu Veli b. İlyas ve diğer Veli b. Fazlullah nâm kimesneler şehâdetleriyle şer‘an sâbit olan Ahmed b. Abdullah meclis-i şer‘-i şerîfde bi’l-vekâle ikrâr ve takrîr-i kelâm edip müvekkilim mezbûr İbrahim Çelebi kendüye rıkkını mu‘terife olan işbu uzun boylu, sarı açık kaşlı ve sarı elâ gözlü Rusiyyetü’l-asl bâ‘isetü hâze’l-kitâb Gülistan bt. Abdullah nâm câriye-i memlûkesini hasbeten lillâhi’l-meliki’l-hallâk ve taleben li-merzâti’r-rabbi’r-rezzâk mâlından tahrîr ve i‘tak ve sâir harâir-i asliyyâta ilhâk ve idrâc eyledi, ba‘de’l-yevm mevsûfe-i mezbûre Gülistan sâir harâir-i asliyyât gibi hür olup müvekkilim mezbûr İbrahim Çelebi’nin üzerinnde velâ-yı şer‘îden gayrı hakkı kalmadı dedikde mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: Ömer Çelebi b. Mehmed, Ali Çelebi b. İbrahim, Mehmed Çelebi b. Abdullah, Mehmed Çelebi b. Muharrem, Receb Çelebi b. Mehmed.