İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 146 Hüküm no: 146 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. İstoyko’nun Hacı Muhyiddin mahallesinde olan evdeki hisselerini kızkardeşi Siltane ile Tarandafilo v. Moşak’a satması Mahmiye-i İstanbul’da Edirnekapısı kurbünde Hacı Muhyiddin mahallesinde sâkin Manol v. İstoyko nâm zimmî meclis-i şer‘-i hatîrde kendi tarafından asîl ve zevcesi Seltane nâm nasrâniye tarafından ikrâr-ı âti’z-zikri tasdîka vekîl-i sâbitü’l-vekâlesi olan işbu bâ‘isü’l-vesîka Tarandafilo v. Moşak nâm zimmî muvâcehesinde ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Mevlevihâne Vakfı ve bir tarafı Rüstem Paşa Vakfı ve bir tarafı Kazer bahçesi ve bir tarafı tarîk-i âm ile mahdûd fevkānî üç oda ve tahtânî bir oda ve sofa ve su kuyusu ve bahçeyi müştemil mülk menzilin üç sehimden bir sehmi hemşîrem mezbûre Seltane’nin ve iki sehmi benim mülküm olmağla zikr olunan iki sehm hissemin bir sehmini mezbûre Seltane’ye ve bir sehmini mezbûr Tarandafilo’ya yüz otuz guruşa bey‘ ve temlîk ve teslîm, onlar dahi iştirâ ve kabûl ve temellük ve tesellüm eylediklerinden sonra semeni olan meblağ-ı mezbûr yüz otuz guruşu yedlerinden tamâmen alıp kabz eyle[dim] ve ba‘de’l-yevm hisse-i mezkûrem mezbûrânın mülk-i müşterâlarıdır, mutasarrıf olsunlar dedikde gıbbe’t-tasdîki’l-mu‘teber [29b] mâ-vaka‘a bi’t-taleb ketb olundu. Fî evâhiri Muharremi’l-harâm li-sene mi’e ve elf. Şuhûdü’l-hâl: Mehmed Efendi el-İmâm, Durmuş Çelebi, Musli Beşe b. ( ), Kayyûm Mehmed Efendi, Papa Tarandafilo v. Yorgi, Dimitri v. Nikola, Papa Dimitri.