İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 146 Hüküm no: 147 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. Manyas’ın Bayezid Ağa mahallesinde olan evdeki yarı hissesini İvaz Odabaşı b. Murad’a satması Mahmiye-i İstanbul’da Sulumanastır mahallesinde sâkin Arakil v. Manyas nâm Ermeni meclis-i şer‘-i hatîr-i lâzım[ü’t-tevkīrde] işbu hâfiz-i hâze’l-kitâb İvaz Odabaşı b. Murad mahzarında ikrâr ve takrîr-i kelâm edip akd-i âti’z-zikrin sudûruna değin nısfı benim ve nısf-ı âharı işbu hâzır bi’l-meclis Yanos nâm zimmînin iştirâken mülkümüz olup mahmiye-i mezbûrede Topkapısı kurbünde Bayezid Ağa mahallesinde vâki‘ bir tarafdan bazen Kuşçubaşı ve bazen Hüseyin Çelebi mülkleri ve bir tarafdan mezbûr Yanos mülkü ve bir tarafdan Avanos nâm zimmî mülkü ve bir tarafdan Bozacıoğlu odaları ile mahdûd fevkānî üç bâb oda ve bir sofa ve dehlîz ve tahtânî üç bâb oda ve kenîf ve müşterek şu kuyusunun dört sehimden benim hissem olan bir sehm-i şâyi‘i müştemil mülk menzilden benim hissem olan nısf-ı şâyi‘i bi-cümleti’t-tevâbi‘ ve’l-levâhık mezbûr İvaz Odabaşı’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile iki yüz yirmi esedî guruşa bey‘ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yüz yirmi esedî guruşu mezbûr İvaz Odabaşı yedinden bi’t-tamâm ve’l-kemâl ahz u kabz eyledim, ba‘de’l-yevm menzil-i mahdûd-ı mezkûrda olan hisse-i şâyi‘am mezbûr İvaz Odabaşı ‘nın mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: el-Hâc De[r]viş Odabaşı b. Mehmed, İbrahim Odabaşı b. Mehmed, el-Hâc Halil b. İbrahim Çelebi Mestçi, Hüseyin Çavuş b. Musli.