İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 147 Hüküm no: 148 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergah-ı Âlî Yeniçerilerine mahsus vakfın mütevellisi Halil Beşe b. Mehmed’in vakfın vefat eden el-Hac Mehmed b. Ahmed’deki alacağını terekesinden almak istemesi Dergâh-ı âlî yeniçerilerinin on birinci cemâ‘at mütevellîsi olan bâ‘is-i hâze’l-kitâb Halil Beşe b. Mehmed nâm kimesne meclis-i şer‘-i kavîm-i lâzımü’t-tekrîmde oda-i merkūme yoldaşlarından iken bundan akdem fevt olan el-Hâc Mehmed b. Ahmed b. Abdurrahman’ın li-ebeveyn ammizâdesi ve vârisi olmağla terekesine vâzı‘u’l-yed olan İbrahim nâm kimesne mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûrun yedinde olan işbu istiğlâl hücceti nâtık olduğu üzere taraf-ı vakf-ı mezbûre asl-ı mâl olmak üzere yüz yetmiş guruş deyni olup meblağ-ı mezbûrun yirmi guruşunu hayâtında edâ edip yüz elli guruşu zimmetinde bâkī kalıp hatta meblağ-ı bâkī-i mezbûr yüz elli guruş taraf-ı vakf-ı mezbûra deyni olduğunu ikrâr dahi etdiğinden sonra kable’l-edâ fevt olmağla mezbûr İbrahim’e suâl olunup terekesinden edâya tenbîh olunmak matlûbumdur dedikde gıbbe’s-suâl mezbûr İbrahim cevâbında tereke-i müteveffâ-yı mezbûra vaz‘-ı yedini ikrâr lâkin husûs-ı mezbûru münkir olmağın mütevellî-i merkūmdan müdde‘âsını mübeyyin beyyine taleb olundukda udûl-ı müslimînden olup oda-i mezkûre yoldaşlarından Hüseyin Beşe b. Veli ve Mehmed Beşe b. Hüseyin nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. Ahmed b. Abdurrahman hayâtında taraf-ı vakf-ı mezbûra vech-i meşrûh üzere yüz elli guruş zimmetimde vâcibü’l-edâ deynimdir deyü bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebiyle meblağ-ı bâkī-i merkūme [31a] yüz elli guruşu müteveffâ-yı mezbûrun terekesinden müdde‘î-i merkūma edâ ve teslîme merkūm İbrahim’e tenbîh olunmağın mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: Mehmed Efendi b. Mehmed, İbrahim Ağa kethudâ-yı ( ) efendi, Ahmed Ağa Hazînedâr, el-Hâc Süleyman Çukadâr, el-Hâc İbrahim.