İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 148 Hüküm no: 149 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Abdurrahman’ın, annesi Emetullah bt. Hüseyin’in boşandığı kocası Mustafa Efendi b. Şaban’daki mehir ve nafaka alacağı ile kendi alacağını tahsil etmesi Mahmiye-i İstanbul’da Neslişah Sultan mahallesinde sâkine Emetullah bt. Hüseyin b. Mehmed nâm hâtûnun vâlidesi ve tarafından husûs-ı âti’l-beyâna vekîl olduğu zâtlarını ma‘rifet-i şer‘iyye ile ârifân mahalle-i mezbûre sükkânından Mehmed Çelebi b. Haydar ve Abdurrahman Çelebi b. Derviş şehâdetleriyle şer‘an sâbit olan Râbia bt. Abdurrahman nâm hatun meclis-i şer‘-i şerîf-i enverde müvekkile-i mezbûrenin zevc-i dâhili işbu bâ‘isü’l-kitâb Mustafa Efendi b. Şaban mahzarında ikrâr-ı tâm ve takrîr-i kelâm edip kızım müvekkilem mezbûre Emetullah Hâtûn’un zevci mezbûr Mustafa Efendi zimmetinde mütekarrir ve ma‘kūdün-aleyh olan yüz guruş mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzere ben vekâletim hasebiyle zevci merkūm Mustafa Efendi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl etdikden sonra hukuk-ı zevciyyete ve mezkûr zimmetinde cihet-i karzdan benim kendi hakkım olan seksen guruş ve sâir hukuk-ı ma‘lûme ve mechûleye müte‘allika âmme-i da‘vâdan asâleten ve vekâleten merkūm Mustafa Efendi’nin zimmetini ibrâ-i âmla ibrâ ve ıskāt edip ol dahi kezâlik cemî‘ hukuk-ı ma‘lûme ve mechûleden benim ve kızım mezbûrenin zimmetimizi ibrâ-i âmla ibrâ ve ıskāt eyledi, min ba‘d biri birimizle da‘vâ ve nizâ‘ımız kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Abdurrahman Efendi el-İmâm, Halil Efendi el-İmâm, Ebûbekir Efendi b. Ahmed, Mehmed Ağa b. Ali, Ali Beşe b. Receb, İbrahim Çelebi b. Ahmed, Mehmed Çelebi b. Haydar.