İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 149 Hüküm no: 150 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Mustafa’nın eski damadı Halil Çelebi b. Ahmed’deki alacağını tahsil etmesi Mahmiye-i İstanbul’da Mi‘mâr Sinan mahallesinde sâkine Saime bt. Mustafa nâm hatun tarafından husûs-ı âti’l-beyâna vekîl olup zât-ı mezbûreyi marifef-i şer‘iyye ile ârifân olan Mehmed Çelebi b. Abdi ve Mehmed Çelebi b. Süleyman şehâdetleriyle şer‘an vekâleti sâbit olan kebîre kızı Rukiye bt. Ahmed nâm hatun meclis-i şer‘-i şerîf-i enverde kendinin sâbık zevci olan işbu bâ‘isü’l-kitâb Halil Çelebi b. Ahmed mahzarında ikrâr-ı tâm ve takrîr-i kelâm edip mezbûr Halil Çelebi ile nikâh beynimizde kāime iken vâlidem müvekkile-i mezbûre Saime Hatun âhara bey‘ eylediği menzili bahâsından iki yüz yirmi beş esedî guruşu mezbûr Halil Çelebi’ye ikrâz ve teslîm, ol dahi iktirâz ve kabz ve tesellüm eyledikden sonra meblağ-ı mezbûrdan yüz on iki guruşunu edâ ve teslîm edip yüz on üç guruşunu edâdan imtinâ‘ edip hatta meblağ-ı mezkûru edâya hükm-i şer‘î lâhık olmuşdu. El-hâletü hâzihî meblağ-ı mezbûrdan doksan beş guruşunu bana edâ ve teslîm, ben dahi bi’l-vekâle alıp kabz edip on sekiz guruşdan gayrı bir akçe ve bir habbe kalmayıp husûs-ı mezbûra müte‘allika bi-vechin mine’l-vücûh da‘vâ ve nizâ‘ımız kalmayıp cemî‘ da‘vâdan mezbûru ibrâ ve ıskāt eyledim dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: Abdullah Efendi [b.] el-Hâc Veli, Sarrâc Ali Çelebi, es-Seyyid Mustafa b. es-Seyyid Hasan, el-Hâc Hüseyin b. Ahmed, Mehmed Ağa b. Derviş Ali, Mehmed Çelebi b. Abdi, Mehmed Çelebi b. Süleyman.