İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 149 Hüküm no: 151 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kengiri sancağı Karaviran kazası Budakviran köyünden Süleyman b. Halil’in haksız yere parasını alan Hasan b. Receb ile sulh olması Fi’l-asl vilâyet-i Anadolu’da Kengiri sancağında Karaviran kazâsına tâbi‘ Budakviran nâm karye ahâlîsinden olup mahmiye-i İstanbul’da müsâfiret vechi [üzere] Bahçekapısı kurbünde sâkin hamal tâifesinden Süleyman b. Halil nâm kimesne meclis-i şer‘de işbu râfi‘ü’l-kitâb Hasan b. Receb mahzarında ikrâr ve takrîr-i kelâm edip mezbûr Hasan târih-i kitâbdan bir sene mukaddem karye-i mezbûreye sarıca ve sekbân ile gelip bi-gayrı hakkın benim elli guruşumu ahz u kabz etmişdi, hâlâ meblağ-ı mezbûru merkūm Hasan’dan da‘vâ ve taleb eylediğimde beynimizde münâza‘ât-ı kesîre cereyânından sonra muslihûn tavassut edip da‘vâ-yı mezkûremden beni mezbûr Hasan ile on beş guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on beş guruşu tamâmen ahz u kabz eylediğimden sonra bâkī otuz beş guruş mütâlebesinden mezbûr Hasan’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Şuhûdü’l-hâl: el-Hâc Mümtaz b. el-Hâc Nuh, İsmail Efendi, Ali Beşe Duhâncı, Ömer Ağa, Hüseyin b. Mustafa, İbrahim Çelebi b. Ahmed.