İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 150 Hüküm no: 152 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu taifesinden Kosta v. Yani’nin Abdulbâki Paşa Evkafı’na ait mumhanedeki hissesinin tasarruf hakkını Armad v. Toros’a satması Mahmiye-i İstanbul’da Mumcu tâifesinden Armad v. Toros nâm zimmî meclis-i şer‘-i şerîf-i enverde yine tâife-i mezbûreden Kosta v. Yani nâm zimmî mahzarında ikrâr ve takrîr-i kelâm edip merkūm Abdulbâki Paşa Evkāfı’ndan icâre-i mu‘accele ve ayda yüz elli akçe mü’eccele ile ale’l-iştirâk taht-ı tasarrufumda olup Balatkapısı hâricinde Karabaş mahallesinde vâki‘ bir tarafdan tarîk-i âm ve bir tarafdan sâhil-i bahr ve bir tarafdan Ferruh Kethudâ Vakfı olan odalar ve bir tarafdan Yahudihâne ile mahdûd mumhânenin dört sehimden bir sehmi olan hisse-i şâyi‘amın hakk-ı tasarufunu bi-izni mütevellî mezbûr Armad’a iki yüz seksen guruş bedel mukābelesinde ferâğ ve tefvîz, ol dahi ber-vech-i muharrer tefevvüz ve kabûl edip ve mülküm olup zikr olunan mumhâne içinde olan bir kazgan ve bir mengene ve beş yüz çubuk ve bir küp ve bir kalıp ve sâir beynimizde ma‘lûm mumhâne âlâtından dahi dört sehimden bir sehm ale’l-iştirâk hissemi dahi mezbûra yirmi guruşa tarafeynden îcâb ve kabûlü hâvî bey‘-i kat‘î ile bey‘ ve temlîk, ol dahi iştirâ ve temellük ve kabûl etdiğinden sonra bedel-i merkūm iki yüz seksen guruşu ve semen-i mezbûr yirmi guruşu ki cem‘an üç yüz guruşu mezbûr Armad yedinden bi’t-tamâm ahz u kabz edip ba‘de’l-yevm zikr olunan mumhânenin dört sehimden bir sehmi mezbûrun hakk-ı makbûzu ve âlât-ı mezbûrenin dahi kezâlik bir sehmi mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Muharremi’l-harâm li-sene mi’e ve elf. Şuhûdü’l-hâl: es-Seyyid Osman Çelebi b. Hüseyin, Ali Çelebi b. Ahmed, Ali Beşe b. İbrahim, İbrahim Çelebi b. Ahmed, Nikola v. ( ), Yako v. Nikola, Dimitri v. Yorgi.