İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 151 Hüküm no: 153 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hüseyin’in sahip olduğu bütün eşyaları azat ettiği cariyesi Muammer bt. Abdullah’a hibe etmesi Mahmiye-i İstanbul’da Akseki mahallesi sâkinelerinden olup zâtı ma‘rifet-i şer‘iyye ile ârifân İsmail Çelebi b. Murad ve Mustafa Çelebi b. el-Hâc Ahmed nâm kimesne ta‘rîfleriyle mu‘arrefe olan Âişe bt. Hüseyin nâm hatun meclis-i şer‘-i şerîf-i enver ve mahfil-i dîn-i münîf-i ezherde mu‘tekası işbu bâ‘isetü’l-kitâb Muammer bt. Abdullah nâm hatun mahzarında ikrâr ve takrîr-i kelâm edip eşyâ-i memlûkemden otuz miskāl bir çift altın bilezik ve bir sîm kuşak ve bir incili kuşak ve on aded atlas ve hatâî kaftan ve bir şamî çuka ferâce ve iki döşek ve dört minder ve sekiz yorgan ve on iki beledî yastık ve beş kebîr ve sagīr tencere ve yirmi sahan ve bir baklava tepsisi ve bir kebîr sini ve bir kebîr güğüm ve bir ocak kömeği? ve bir kebîr kazgan ve otuz tabak ve beş döşek çarşabı ve iki leğen ma‘a ibrik ve beş kāimemi mu‘tekam mezbûre Muammer Hâtûn’a hibe-i sahîha-i şer‘iyye ile hibe ve teslîm, ol dahi ber-vech-i muharrer meclis-i hibede ittihâb ve tesellüm ve kabz eyledi, ba‘de’l-yevm zikr olunan eşyâ-i mezbûre Muammer’in mülk-i mevhûbu olup benim kat‘â eşyâ-i mezkûrede ve menzil içinde mevcûd olan kalîl ve kesîr ve sâir eşyâda ve bi’l-cümle hâlâ lâbise olduğum işbu köhne libâsımdan gayrı ism-i mâl [32a] ıtlâk olunur şeyim yokdur ve bir şeye mâlike değilim, cümlesi mu‘tekam mezbûre Muammer’in mülkü ve hakkıdır dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâmin ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Mustafa Çelebi b. el-Hâc Ahmed, İsmail Çelebi b. el-Hâc Murad, İbrahim Çelebi b. Ahmed, Mehmed Çelebi b. İbrahim, Ebûbekir b. Hüseyin, Mehmed Çelebi b. Hüseyin.