İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 151 Hüküm no: 154 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçi Aksak Sino v. Manol ile azatlı kölesi olan ortağı Yorgi v. Yani’nin terekeleri konusunda varislerin anlaşarak birbirlerinin zimmetlerini ibra etmeleri Husûs-ı âti’l-beyânın mahallinde ketb u tahrîri için savb-ı şer‘-i mergūbdan matlûben irsâl olunan Mevlânâ es-Seyyid Abdülmu‘ti Efendi mahmiye-i İstanbul’da Kumkapı kurbünde Muhsine Hatun mahallesinde sâkin İpekçi Yorgi nâm zimmînin menziline varıp zeyl-i kitâbda muharrerü’l-esâmî udûl-ı müslimîn ve sikāt-ı muvahhidîn huzûrlarında akd-i meclis-i şer‘-i Nebevî eyledikde mahalle-i mezbûrede sâkin iken bundan akdem hâlik olan İpekçi Aksak Sino v. Manol nâm zimmînin li-ebevyen karındaşları evlâdı olmağla zî-rahm cihetinden hasren vârisleri olan Yorgi ve Nisaro veledey Balaban Yani nâm zimmî ve nasrâniye ba‘de’t-ta‘rîfi’ş-şer‘î meclis-i ma‘kūd-ı mezkûrda hâlik-i mezbûr Aksak Sino’nun abd-i mu‘takı ve hayâtlarında ipekçilik san‘atında şerîki olup kendüden sonra mürd olan diğer Yorgi v. Yani nâm zimmînin zevce-i menkûha-i metrûkesi olmağla terekesine vâzı‘atü’l-yed olan Vesinye nâm nasrâniyenin babası ve tarafından husûs-ı âti’z-zikre vekîli olduğu zâtını ma‘rifet-i şer‘iyye ile ârifûn Papa Hürmüz v. Asat ve Vasil v. Yani ve Dimitri v. Todor nâm zimmîler şehâdetleriyle şer‘an sâbit olan Anderye v. Sava nâm zimmî muvâcehesinde her biri ikrâr-ı tâm ve takrîr-i kelâm edip dayımız ve mûrisimiz hâlik-i mezbûr Aksak Sino’nun mezbûr diğer Yorgi zimmetinde cihet-i şirket-i mezbûreden ve deyn-i şer‘îden bin beş yüz guruş hakkı olup irsen bize isâbet ve intikāl etdiğinden mâ‘adâ dayımız mürd oldukda mezbûr diğer Yorgi yanında bulunmağla ekser muhallefâtını kabz ve bizden ketm u ihfâ edip ba‘dehû ol dahi hâlik oldukda cümlesi senin yedinde kalmışdı deyü bundan akdem husûs-ı mezbûru müvekkile-i mezbûre Vesinye’den taleb ve da‘vâ etdiğimizde beynimizde münâza‘ât-ı şedîde ve muhâsamât-ı ekîde vukū‘undan sonra muslihûn tavassut edip mezbûr Anderye vekâleti hasebiyle bizimle beş yüz guruş üzerine sulh oldukda biz dahi sulh-ı mezbûru kabûl ve bedel-i sulh olan meblağ-ı mezbûr beş yüz guruşu müvekkile-i mezbûrenin kendi mâlından vekîl-i merkūm Anderye zimmî yedinden tamâmen ahz u kabz etdiğimizden sonra husûs-ı mezbûr ve meblağ-ı mezbûr bin beş yüz guruşa ve dayımızın kalîl ve kesîr ve bi’l-cümle ism-i mâl ıtlâk olunur terekesine ve mahalle-i mezbûrede vâki‘ Süleyman Ağa Vakfı’ndan diğer Yorgi’nin evlâdı tasarruflarında olan vakıf menzil ve târih-i terkīme gelince bizim beynimizde ve hâlikân-ı mezbûrân beynlerinde cereyân eden ahz u i‘tâ ve mu‘âmelât-ı şettâ ve sâir hukuk-ı ma‘lûme ve mechûleye müte‘allika âmme-i de‘âvî ve mütâlebâtdan ve eymân ve muhâsamâtdan müvekkile-i mezbûre Vesinye ve hamli ve evlâd-ı sıgārı Martoye ve Suskene’nin ve merkūm Anderye’nin zimmetlerini ibrâ-yı âmla ibrâ ve ıskāt eyledik, ol dahi kezâlik bu güne gelince bu husûsa ve sâir husûslara müte‘allika cemî‘ da‘vâdan bizim zimmetimizi ibrâ-yı âmla ibrâ ve ıskāt eyledi, ba‘de’l-yevm vechen mine’l-vücûh ve sebeben mine’l-esbâb biri birimizle da‘vâ ve nizâ‘ımız ve hak ve müstehakkımız kalmamışdır dediklerinde gıbbe’t-tasdîki’l-vicâhî ve’t-tahlîfi’ş-şifâhî vâki‘-i hâli mevlânâ-yı mezkûr mahallinde tahrîr ba‘dehû ma‘an ba‘s olunan İbrahim Çelebi b. Ahmed ve Ali b. Bâli ile meclis-i şer‘a gelip her biri alâ vukū‘ihî inhâ ve takrîr etmeğin mâ-hüve’l-vâkı‘ bi’t-taleb ve’l-istîfâ ketb u imlâ olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: İsmail Çelebi b. İbrahim, el-Hâc Mehmed Efendi, İbrahim Çelebi b. Hüseyin Kethudâ, es-Seyyid Mustafa Çelebi b. es-Seyyid Ahmed, Ahmed Çelebi b. İbrahim, İbrahim Çelebi b. Ahmed, Papa Hürmüz v. Algar, Yamandi v. Nikola, Dimitri v. Todori, Vasil v. Yani.