İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 153 Hüküm no: 155 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Harrat Kemal Mescidi imamı Hafız Mehmed Efendi b. Ahmed Efendi’nin mescid vakfı gallesinden imamlara şart olan geliri mütevelliden istemesi Mahmiye-i İstanbul’da Sarıgörez kurbünde merhûm Harrât Kemal Mescid-i şerîfi’nde hâlâ imâm olan işbu sâhibü’l-kitâb Hâfız Mehmed Efendi b. Ahmed Efendi meclis-i şer‘de mescid-i mezbûrun evkāfının bi’l-fi‘il mütevellîsi olan diğer Mehmed Efendi b. Mehmed mahzarında üzerine da‘vâ ve takrîr-i kelâm edip merhûm-ı mezbûr defter-i sultânîde mukayyede olan sûret-i vakfiye-i ma‘mûlün-bihâ mûcebince evkāf-ı mezbûresi gallesinin sülüsânını zikr olunan mescidin imâmetine ve sülüsünü müezzine şart ve ta‘yîn edip ve ben mescid-i mezbûra yedimde olan berât-ı sultânî mûcebince târih-i kitâb şehrinin gurresinden berü imâm olup bi’z-zât edâ-i hizmet ederken galle-i evkāf-ı mezbûreden mütevellî-i mezbûr yedinde yirmi [yedi] bin akçe hâsıl olup hâlâ mevcûd olmağla meblağ-ı mezbûrun sülüsânı olan on sekiz bin akçe ber-mûceb-i şart-ı vâkıf hakk-ı sarîham iken mütevellî-i mezbûrdan taleb eylediğimde bana teslîmden imtinâ‘ eder, suâl olunup alıverilmesi matlûbumdur deyip ve fi’l-vâki‘ evkāf-ı mezbûrenin sülüsânı gallesi mescid-i mezbûrun imâmına meşrût olduğu mübeyyen ve mazmûnu müsbet ve mütebeyyin sûret-i defter-i sultânî ibrâz etdikde gıbbe’s-suâl mütevellî-i mezbûr cevâbında fi’l-vâki‘ kaziyye vech-i meşrûh üzere olup galle-i evkāf-ı mezbûreden müdde‘î-i mezbûrun imâmeti hâlinde hâsıl olup ve hâlâ yirmi yedi bin akçesi yedinde mevcûd olduğunu mukır ve mu‘terif olmağın mûcebince ba‘de’l-hükmi’ş-şer‘î meblağ-ı mezbûr yirmi yedi bin akçeden müdde‘î-i mezbûrun ber-mûceb-i şart-ı vâkıf hissesi olan on sekiz bin akçesi müdde‘î-i mezbûra def‘ ve teslîme mütevellî-i mezbûra tenbîh birle mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Mehmed Efendi b. Müftîzâde, Mustafa Efendi b. Hüseyin, Abdulbâki Efendi b. Mehmed, Mehmed Efendi b. Hüseyin.