İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 153 Hüküm no: 156 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Şükrullah’ın Hatice bt. Mustafa’daki alacağının tahsilini istemesi Medîne-i Galata muzâfâtından kasaba-i Tophane’de Firuz Ağa mahallesinde sâkine Âişe bt. Şükrullah nâm hatun meclis-i şer‘-i şerîfde Avni Efendi mahallesinde sâkine Hadice bt. Mustafa nâm hatun mahzarında üzerine da‘vâ ve takrîr-i kelâm edip mezbûre Hadice zimmetinde bundan akdem işbu hâzıra bi’l-meclis Saliha bt. Abdullah yediyle benden iştirâ ve kabz eylediği kara gözlü, kara kaşlı Gürciyyetü’l-asl tahmînen on iki yaşında Rukiye nâm câriye-i memlûkem bahâsından yüz guruş hakkım olup mukaddemâ meblağ-ı mezbûrun yetmiş iki guruşunu istîfâ ve kabz edip yirmi sekiz guruşu zimmetinde bâkī kalmağla hâlâ taleb ederim, suâl olunsun dedikde gıbbe’s-suâl mezbûre Hadice cevâbında kaziyye vech-i meşrûh üzere olup müdde‘iye-i mezbûreden ber-vech-i mübeyyen iştirâ ve kabz eylediği câriye-i mezbûre Rukiye bahâsından bâkī yirmi sekiz guruş zimmetinde elân deyni olduğunu ikrâr u i‘tirâf etmeğin mûcebince meblağ-ı bâkī-i mezbûr yirmi sekiz guruşu müdde‘î-i mezbûre Âişe Hâtûn’a edâ ve teslîme mezbûre Hadice Hâtûn’a ba‘de’t-tenbîh mâ-vaka‘a bi’t-taleb ve’l-istîfâ ketb u imlâ olundu. Fi’l-yevmi’s-sânî ve’l-ışrîn min Şevvâli’l-mükerrem li-sene tis‘a ve tis‘în ve elf. Şuhûdü’l-hâl: Ali Bey b. Musa, Ali Çavuş, Hüseyin Beşe b. ( ) Abdi, İbrahim Çelebi b. Ahmed, Hüseyin Çelebi b. Mehmed, Mehmed Çelebi b. ( ) Çorlu, Ali b. Bâli.