İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 154 Hüküm no: 157 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Süleyman’ın mehir ve nafakasını alarak Mustafa Çelebi b. Ahmed’den boşanması Mahmiye-i İstanbul’da Kassâb Timurhan mahallesi sâkinelerinden olup zâtı ma‘rifet-i şer‘iyye ile ârifân Hamid Efendi b. Emrullah ve Hüseyin Çelebi b. Abdülvehhab ta‘rîfleriyle mu‘arrefe olan Âişe bt. Süleyman nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-kitâb Mustafa Çelebi b. Ahmed mahzarında ikrâr-ı tâm ve takrîr-i kelâm edip zevcim mezbûr Mustafa Çelebi zimmetinde mütekarrir ve ma‘kūdün-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Mustafa Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eylediğinden sonra hukuk-ı zevciyyete ve sâire müte‘allika âmme-i da‘vâdan herbirimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fî gurreti Saferi’l-hayr li-sene mi’e ve elf. Şuhûdü’l-hâl: Hamid Efendi b. Emrullah, Hüseyin Çelebi b. Abdülvehhab, Hüseyin Çelebi b. Salih, İbrahim Çelebi b. Ahmed.